Kesusastran Bali Purwa
54. Batun sekep di beten klumpu,
ngaba jukut mawadah kisa.
Lamun idep pada cumpu,
nguda takut ninggal desa.
55. Bawang jukut bawang tatah,
siap jalak urek sangsit.
Ngomong takut ngorahang nah,
liat galak anggon wangsit.
56. Tanggung bedeg mabadingan,
gangsing gabus kasanglupin.
Kudu jegeg maklinyaran,
asing bagus kasanggupin.
57. Beli Kompiang luas ka Panji,
carang palang kena batu.
Yan tiang ngelong janji,
apang tiang kena tantu.
58. Kedis curik mabasa manis,
bungkung pendok sedeng di tujuh.
Bajang cerik kenyungne manis,
selat tembok makita nyujuh.
59. Limon cuka matabeng plindo,
buah anggur getok-getokin.
Lamun suba manyama pindo,
jawat lebur lakar tohin.
60. Kulik-kulik di batan umah,
tingklik cenik pejang diwang.
Cerik-cerik mapumahan,
tangkih clemik tuara tawang.
13
