Kembang Rampé
Radén Mantri lantas ngandika, nyaru-nyaru nakenang siap tekén Mén Bekung.
"Mémé Bekung."
"Titiang Ratu Radén Mantri".
"Mémé ngajinang siap nirané mai? Mara seluk ukana kabongbong laut ngeleb. Anak mai dogén ja lakuna i tunian".
"Titiang matur sisip Ratu Radén Mantri, tan pisan titiang ngantenang ayam duen cokor I Déwa mriki," kéto atur Mén Bekungé, ngandika buin ida Radén Mantri, "mémé Bekung, to nyén né nunun i tunian dini?"
"Titiang madué pianak Ratu Radén Mantri".
"Dadi Mémé nget suba ngelah pianak bajang teka dija Mémé maan pianak?"
"Matur sisip Ratu Radén Mantri, antuk titiang ngidih Ratu ring titiang madué nyama, jumah kangin".
"Nyén adanné panak Méméné?"
"Ni Wayah Waluh, Ratu Radén Mantri". Pragat ambul to patakon ida Radén mantri, lantas ida mantuk.
Ceritanné sai-sai koné ia ka taman kumah Mén Bekungé, ida Radén Galuh Daha suba anggon ida améng-améng, tur lantas Ni Wayan Waluh mobot.
Kasuén-suén, kacerita ida Radén Galuh Singasari suba madué oka istri. Ya matigang sasian okan ida Radén Galuh Singasari, ya embas koné okan Ida Radén Galuh Daha, lanang.
Kacerita odalan okan ida Radén Galuh Singasari, okan Ida Radén Galuh Daha matigang sasian, tur prabéan nigang sasihin makejang kamedalang olih ida Radén Mantri. Okan ida di puri tra runguang ida, teka okan idané di taman koné upahanga ida gong muah igel-igelan.
Kacerita jani arin ida Radén Galuh Daha, Radén Mantri Madé, nyilib ida lunga ngrereh rakané. Sapakaon ida Radén Mantri Madé, mawuwuh-wuwuh koné sungsut ida sang
116
