Kesusastran Bali Purwa
ia kasuryak-suryakin, sabatas anaké ningalin makejang ngon, déning tumbén nepukin jlema mawak asibak, matendas asibak, malima anéh, mabatis anéh, maprana asibak, makejang asibak. Dadi rejenga I Raré Sigaran tekén anaké, kanti suud baana igel-igelané. Mén Raré Sigaran milu masih nyluksuk medasin anaké krebut baan anaké mabalih. Sasubanné pedas baana, panakné rebuta ditu, lantas jemaka I Raré Sigaran tur ajaka mulih. Di subané teked jumah, lantas ia nguwél, nguélin kurenanné, baané ia ampah ngajak pianak.
Makelo-kelo kacerita I Raré Sigaran morahan tekén mémé bapanné, kéné munyiné "nah Mémé kalih Bapa, jani tiang ngalahin Mémé kalih Bapa luas kaalasé, praya ngalih nyaman tiangé buin asibak, réh kimud pesan tiang kéné mawak asigar dadi kakedekan gumi."
Masaut méménné, "nah kema cening luas, nanging da makelo!" Déning mémé bapanné suba maang galah, lantas I Raré Sigaran ngungsi alasé, menék gunung tuun gunung.
Kacerita di tengah alasé, ia kacunduk padukuhan dané Jero Dukuh Sakti. Jero Dukuh matakon awanan ka alasé? I Raré Sagiran laut nguningayang pariindikanné, "inggih Jero Dukuh, mawinan titiang rauh mriki, antuk ibuk manah titiang mawak asibak. Mangkin titiang jaga ngrereh nyaman titiangé sané malih asibak."
Ngandika Jero Dukuh Sakti, "béh cening, nyaman ceninge anak tusing ja ada di alasé ténénan, anak ia ditu di suargan, di pamedal ida Betara Guru mrupa paras. Nah cening tuara tau krana cening mawak asigar muah krana nyaman ceninge nongos di suargan, bapa nuturin cening. I malu dugas ceningé nu di belingan mémén ceningé, mémén ceningé sisip mimisuh-misuh ida Betara Guru, déwék ceninge kambil asibak baan ida Betara," kéto pangandikan dané sang ngelarang yoga nglepugan asep. Dukuh Sakti nganikain mangda I Raré Sigaran nut asep dupané. Raris asepe tuuta tekén I Raré Sigaran.
123
