Kembang Rampé
"Jero, jero anak odah, kija lakun tiang ngalih Bapan tiangé? Koné di tanggun langité né barak né kangin?"
Masaut anaké tua, "né cai nyén koné tuah asibak?"
"Titiang I Sigir nika."
"Nah lamun cai nyak ngupahin kaki ketipat taluh mulam taluh asiki, kal orin." I Sigir masaut "niki ambil". Lantas baanga anaké odah ketipaté tekén taluhné, tampina baan anaké odah totonan, laut dahara. Suud anaké odah madahar, lantas ngomong kéné, "cai Sigir, né sampin kakiné tegakin, apang énggal cai teked ditu!"
Masaut I Sigir, "sampi galak, bani tiang?"
Masaut anaké odah, "nguda sing bani!" Suba kéto, camoka bungut sampiné baan anaké odah, baanga I Sigir taliné, penékanga ia katundun sampiné, I Sigir négak reko ia ditu. Suba melah tegakné, pecutina baan anaké odah jit sampiné, macuet mlaib sampiné alah mimis, mameteng banéng kangin. Kanti sing bani kedat I Sigir di tundun sampiné kanti bin kayangné teked ia di tanggun guminné kangin sig lawang idané Betara Surya medal. Teked I Sigir ditu, sedeng melaha ida Betara Surya nyuluhin guminné. Lantas I Sigir ia matur, "Ratu Betara Surya, Ratu reké ngardi titiang, mawinan wénten titiang sapuniki, merupa tan genép masikian, mangkin titiang rauh nangkilang déwék ring Betara, mangda cokor I Déwa ngaksi titiang. Titiang nunas ica ring Betara, mangda dados titiang jlema patut sané rahayu becik. Yan tan Betara lédang, becik pademang titiang iriki! Jengah titiang dados jlema nyalah para," lantas ida Betara ngandika "saja bapa ngrupa cai. Krana kéné lekad cai tuah asibak, né malu mémén cainé salah nunggingin nira sedek majalan di ambarané, wiréh ia sebet busan-busan nuunang ménékang padiné, bakal jemuha sing maan ai, kaselag-selag baan ujan. Ento krana ia kajamah baan téjan bapané. Da ja suba cai teka nuna panyupatang tekén bapa, nah bapa lukata cai. Kema cai manjus mabersih di pasiraman bapané, ento ditu kema laku,
128
