Kaca puniki kavalidasi
76
- Kedek berayane ngakak, ngadesem pada míjalin, jabaning deweke bocok, neraka tan polih lungguh, dewa sakit iring desa, nyupat nyai, bilih cai sida lukat.
- Ni Sumala ngusap mata, bangun patelanan mangeling, majalan mamurang lampah, matungked majalan geruh, tan kocapan aneng marga, kaget prapti, ring palasan Antarala.
- Turun jurang munggah cala, akeh burone kapanggih, gajah warak singa barong, beruang badak muang lembu, macan ijung kidang manjangan, ngresang ati, pagereng mabudi nyarap.
- Tekannyane sranteban, Ni Sumala katampekin, munyine mangresang manah, manrajang nagih manyaup, Ni Sumala tuara ginggang, nglalu mati, idupe manggih sengsara.
- Buron alase makejang, buka kapiwelasan ati, manglingu sami makaon, Ni Sumala lempor tuyuh, sing jalan mreren negak, sarwia ngeling, kaludan basang layah.
- Mangeling masasambatan, nulame Ida Sang Hyang Widi, "Dewa Ratu Hiang Suksma, puputang kawelas hyun, pacang napi jua kariang, titiang urip, kene san kalintang nraka".
- Bangun ngulahang majalan, gunung alase susupín, prapteng sukuning cala, ada katingalan ditu, mirib payasaning dewa, langen asri, watu sumayana petak.
- Maprigi mundag-undagan, mailehan manca saji, danta maukir pakronyoh, sinelaging mirah bang ungu, paturu marupa endah, mangedanin, bebaturan mas matatah.
- Sarwa manik nawaratna, suteja warna maening, bintang Kartikane kasor, pepayonan dewandaru, sarwa kembange majajar, mangiderin, maturut marupa endah.
- Kembang kayu tangi angsana, lilitin gadung kasturi, carangane ngarebo, kembangnyane kuning lumlum, mangiderin panataran, tur ia asri, tlaga sajroning natar.
- Kaideran sarwa kembang, pacargaluh mungging tepi, kasese lan kembang sempol, sungenge kembang kaduduk, gumitir kembang mataram, pucuk putih, pucuk cina pucuk sabrang.
