Kaca puniki kavalidasi
77
- Pucuk biru dadu muang bang, pacar cina pudak sari, pudak cinaga mangrebo, prasama anedeng santun, ikut lutung lan angsoka, muang kanyeri, palasari muang padma rakta.
- Jempiring nyanding subita, lilitan kacita merik, rijasa kembang tigaron, cempaka andeng santun, putih kuning ada barak, ada wilis, bagiratih ento adannya.
- Di tengahing tlaga kocap, tunjung birune ngedanin, tunjung tutur tunjung petak, tunjung nilawati arum, sinelagin trate abang, sami asri, minannyane aliweran.
- Masukan mangalih amah, toyania nirmala ning, pancarania mundag-undag, maturutan susun pitu, ne ring sor pancoran timah, munggah malih, besi pancoran punika.
- Malih luurang tembaga, kekuningan munggah malih, lancung sari ring luuran, malih luuran puniku, pancoran slaka petak, buin apalih, munggah pancoran mas mulia.
- Tinatahan jejanggalan, rinenggaing sarwa manik, nawaratna bang muah ijo, kumrem teja endih murub, nengakena ne ring taman, kocap mangkin, Ni Sumala cinarita.
- Liwat lega mangetonang, titah becike ring beji, bangun patelanan mang regoh, jemak tungkede lumaku, pajalane masreodan, manglawanin, ulangunnanye kaliwat.
- Sapraptane Ni Sumala, masuk jroning ancaksaji, katon sela sumayana, manegeh tur asat alus, mapalih maundag-undagan, mangedanin, panataran asah jimbar.
- Mirib dewa mandrueang, buka ada mangrisakin, kaget ada lewih katon, telaga lintang binangun, becike mangonyang-onyang, mangedanin, mapalipid sarwa emas.
- Ebek sasocane muncar, irib mangasorang rawi, ingideran sarwa puspa, ambune mrik ganda langun, wangine ngebekin taman, langen lewih, sekala taman Hyang Siwa.
- Ni Sumala mangkin kocap, ulangunnyane tan sipi, manglalu sukaan pejah, dija buin suargane ruruh, jani dini apang tawang, idup mati, idup nraka mati suarga.
