Kaca puniki kavalidasi
197
- Pada manuturan ipian, ne lanang teken ne istri, pateh pangipiane, reko, mangipi umahe puun, kalebu maring segara, sareng kalih, kento pada manuturan.
- Ne istri matur anembah, "Punapi reke ne mangkin, ala ayuning pangipian," ne lanang sumaur alus, "Katuturan nyane kuna, ala tui, tan urung manggih bencana".
- Dereng puput makeruna, teka parekan mangalih, "Nunas Gusti ne ka jero, pangandika ida Sang Prabu, mangde gelisang mamarga, karya gati, nawi wenten reraosan".
- I Sidapaksa angucap, teken parekane jani, "Apa ada bebaosan," parekan rais umatur, "Tan mula titiang ring kanda, mangde gelis, I Gusti lunga ka purian".
- Istri Tanjung sawang kagiat, eling ring ipiane nguni, dadi seksek kayunida, jani ia raris masaur, "Paman Patih kema matulak, nira kari, pacang makarya tampinan".
- Parekane ngajabaang, kocap ida sareng kalih, kayune bas kaselekan, masih egar manglelunyuh," Adi jumah jwa pang melah, Bli ka puri, parek ring Ida Sang Nata".
- Ne istri tuara da pasah, kayun idane ne nangkin, "Eda Beli megat pitresna," ne lanang sumaur alus, "Twara Beli mangengsapang, ne ring Adi, wiadin manglesang jiwa.
- Tresnan Beli ring I Dewa, ala ayu sareng tindih, keto ke Adi ingetan, mangda langgeng Adi satuu," raris ida murup sepah, aglis prapti, I Sidapaksa mamarga.
- Egar polahe ring jalan, kelawa manyet di ati, kayune masih manyaruang, mula twah prajurit tuhu, titisan Panca Pendawa, tuhu jati, punika ne kalingan
- Tan sah manyingsetang raga, polahe alus amanis, uning dening kawinaya, kaprentah antuk sang Prabu, tan kocapan maring jalan, aglis prapti, saget rauh ring bancingah.
- Sang Prabu sedek ring odal, punggawane sami manangkil, I Sidapaksa kocapan, nyeleseb raris malungguh, Sang