Kaca puniki kavalidasi
198
- Prabu raris ngandika, "Mai Adi, dini paekan manegak".
- I Sidapaksa ngiringang, tumuli raris manangkil, Sang Prabu alon ngandika, “Yennya Adi durus lulut, manyama daat pitresna, ne ring Beli, tong ada anak elenan.
- Beli ngutus I Adi luas, ka Indraloka ne jani, sewalapatra aturang, nunas emas tigang gelung, nunas ring Betara Indra, apang polih, punggawa sami angucap.
- "Keto Raden Sidapaksa, pangandikan Sri Bupati, tekairingang da tiwal, teka majalan manglaut, takon-takonang di jalan, gati-gati masa tuara kapanggiha".
- Engsek Raden Sidapaksa, tan pangucap ya ring ati, buka tong maan mapengkas, kaselek pacang maatur, raris ida kicen surat, tur mapamit, "Kema jua Adi majalan".
- Kocap Raden Sidapaksa, sing jalan-jalan mangeling, bane twara dadi simpang, maring umahnya puniku, bau mara pangantenan, tong kapanggih, nyapnyap manah titiang bungsang.
- Buka tong dadi majalan, bilang satindak mangeling, "Adi Galuh cingak titiang, tan urungan Beli kapus, tan urungan Beli pejah, twara malih, Beli pacang malipetan.
- Dija kaden Indrabuana, sapasira jua takonin, surgane twara marawit, enyen jua pacang puuk, teka di sisinin alas, tong kapanggih, jani apa puaran titiang".
- Mangeling masesambatan, "Cingak titiang Ibu Aji, Meme Sang Panca Pendawa, dija I Ratu malungguh, cingakin sih kuda titiang, suka mati, idupe nemu sengsara".
- Sigsigan ngeling maguyang, satindak kanggek manolih, kari katresnan ring somah, mirib dane teka nutug, "Lega Adi enu jumah, dewek Beli, pancang mangemasin pejah."
- Manglaut ngajakanginang, manyusup ring alas ukir, akeh buron sada prapta, manyadang ring agung, angulati papanganan, tur kapanggih, I Sidapaksa ring alas.
