Kaca puniki kavalidasi
135
- Yama brata tingkahipun, yen midenda tan papilih, tutujune asing salah, yan sampun masrah ring wengi, undangen pituturana, dendane tulakang malíh.
- Agni brata tingkahipun, maníru kramaning geni, gelise nelahang angkrah, sampun paleh-paleh ugi, tingkahe ngrusak durjana, sampun ngantos lami-lami.
- Lawana brata aranipun, lawana yaktine pasih, yen wenten sisiping wadwa, ne mungguh akedik-kedik, den amot duduning wadwa, sampuranne kadi pasih.
- Mréga brata tingkahipun, ring sadarben wadwa sami, kadi buron ngeton janma, de eling maring Hyang Widi, aja ngawe wadwa susah, becik ngicen ring ngambilin.
- Singa brata wastanipun, pangraksane ring negari, kadi Singa ngraksaking alas, reh raksa-rumaksa malih, ratu rajeg saking wadwa, wadwa kreta saking gusti.
- Anila bratanipun, anila punika angin, yan amagut satru mara, gelise den kadi angin, aja kari taa-taa, pati urip saking Widi.
- Sata brata tíngkahipun, sata ayam yaktineki, tingkah solahe ring wadwa, tingkah solahe ring rabi, punika den kadi ayam, samian kapadaningsih.
- Mayura brata aranipun, mayura merak sayekti, tingkahe den kadi merak, tan pati pangan-pangani, pangenan tan salah ujar, tan wewadonan apekik.
- Cantaka brata aranipun, cantakane paksi kelik, tan melaku sihing wadua, kewala Sang Ratu Asih, teka tumrap sihing wadwa, itu raja akal tinggal.
- Kaganila brata iku, yan kaganila gagak-paksi, yen niwakang dosa pejah, mahumang punggawa sami, yan pateh matut, durusang yan durung, jantosang ugi.
- Wiagra brata wastanipun, wiagra macan yaktineki, yan tan olih durung mara, ring ratune lewih, yan durung karaos sida, durung patut kamargine.