majalan ngaduluang mirig iding di margane ngaregah belak-belok ngaliwatin Gunung Pusuke. Tan caritanan di jalan jam dasa montore saget teked di Cakra. Uli penambangan raganne menek cidomo ka Jeruk Manis apang enggal teked. Makejang dapetanga pada ngumpul jumah.
"Beh, Tu Aji Ngurah ja sareng sami sampun rauh. Ngiring rarisang munggahan malinggih. Titiang sareng sami ngantosang," kenten Pan Kobar nyapa tamiunne.
"Saja Pan Kobar, tiang semengan suba majalan apang enggalan maan marembug dini indik panake lakar pindah magae ka Atambua. Galahe suba nyerepek, mepet pesan. Ento awananne tekane jani amung ngaba awak dogen." Gusti Ngurah Gede lantas malinggih. Gusti Biang Suci nyagjagin Wayan Rempuh di ampike. Lale Dumilah ngaba bandaranne sokasi lan taluhe ka paon baanga Made Sinar. Ngenggalang Made Sinar matakon makisi-kisi.
"Kenken kaputusane. Pidan lakar payu nganten Denda Milah?"
"Yen sing alangan kayang dina Budane buin telun. Nanging Luh Ade eda uyut malu sawireh tiang lakar mararik. Jani Aji lan Ibu mai gumanti lakar ngarembugang indik totonan," kenten Lale Dumilah saha milu nyodaang kopi lan teh abana ka bale daja. Sambilanga ngawedang, Gusti Ngurah, ibu, lan ajinne. Pan Kobar ajak kurenanne iteh marembug indik tata kramane ane lakar kalaksanaang buin telun. Sira ane lakar kautus mapejati, saha banten sesayut alit pabeakalan, lan nuur Pedanda ane lakar muputang. Ibu lan ajinne nyerahang makejang teken Pan Kobar ajak kurenanne.
"Nah, Mbok Rempuh, Pan Kobar tiang tusing buin makekulitan.
Makejang suba pragatang jumah dini, apang tusing ngewehin timpalne i cening yen jumah di Tanjung."
