kamarne bale dangin, mara Gusti Ngurah alon-alon macelep lantas ngundebang kurine bale daja. Petenge nika sajan sepi amung dikadohan munyin celepuke makuuk kelangan bulan, tuara nyidang nepukin lawatne di telagane Gusti Ngurah lan Lale Dumilah osah ngape ape lemah. Liwat tengah lemeng mara sirep. Jam enem Gusti Ngurah sampun matangi lantas malinggih di brugage saha maolah raga. Luh Nari pesu lakar meli be ane mara kalap, ane candaka teken dagange abana di peken. Sasampune nika mara Lale Dumilah bangun saha masaput anduk maakin Gusti Ngurah.
"Beh liwat jam dua tiang mara dadi pules. Bas kawaregan, saputin rasanne ongkeb. Yen ten masaput takut amah legu," kenten Lale Dumilah paliatne kuyu, layu.
"Yen tiang tusing takut teken legu. Nanging sing dadi pules ngapeape apang enggal lemah petenge. Ento awananne tiang mamaca nganti jam dua mara dadi pules."
"Beh, patuh. Tiang masih kenten ngepah ngelel rasanne ngantiang dina Budane buin telun, satmaka buin atiban makelonne." Sang kalih madesekan. Saling paekin, saling sulsul, bibihne makecupan saking rasa asih. Carukcuke elek ngucikcak masuryak.
Ibu lan ajinne matangi ngampakang jendela, nanging tuara nyingak okanne di brugage. Lale Dumilah enggal bangun mara ningalin ibunne ka paon. Ia masih nyagjag ka paon.
"Ooh cening ja suba bangun. Kenken nyak melah sirepe? Miribang legune liu dini. Apa Denda ningalin Luh Nari kija?" Kenten ibunne matakon.
"Tiang wau bangun. Tu Ngurah sane uning Luh Nari ka pasar numbas ulam." Pasautne Lale Dumilah. Gusti Ngurah ka semer nimba yeh anggon ngebekin kamar mandi lan jedinge di paon. Luh Nari saget
