Sorene megentos wengi. Ujan ririse sampun nget, kari damuhe di muncuk don-don kayune nglanting pakenyahnyah kena sunaran lampu tamane. Ketelan yehe uli capcapane kari kletak-kletik kapah-kapah. Tan pajemuga saget wenten tamiu ajaka patpat rauh.
"Om Swastyastu, Gung Ngurah. Titiang Made Malat," aturne paak ka terase.
"Om Swastyastu. Oh Made Malat ja teka. Meriki ja menekan. Niki sira sareng," panyapanne Gusti Ngurah nunden tamiunne malinggih, saha ngenalang matua, ipahne lan Wayan Galang. Samian pada masalaman lantas malinggih.
"Gung Ngurah, niki Ida Bagus Mayun ajinne Dayu, lan niki Bapak tiange Made Wirama sampun diibi rauh meriki. Sedeng becika tiang sampun dadosanga mulih yadin kari nganggen spalk. Gumantine Dayu sampun seger oger mawinan nyidaang meriki."
"Matur suksma De, sujatinne tiang ane lakar ka asrama nanging kabenengan niki matua ajak ipah tiange lan niki keluargan tiange di Cakra mara teka jam empat. Inggih Dabagus Aji lan Pak Made, sami duenang, tiang pateh nasibe sareng I Made lan Dayu dados kurban bencanane. Nanging Hyang Widhi kantun ngicen tuuh mawinan selamet."
"Inggih, nanging pianak tiange elung, mantun tiange karuron. Panumpange siosan kocap ten wenten sane banget keni baya. Beh mula ipun setata lepetan kewanten," aturne Made Wirama matadah sedih ningalin panak lan mantune ane kari acum sebenge.
"Cara raosne I Made lan Dayu, mirib dereng kalugra lakar ngelah anak cerik."
"Mirib wiakti Gung Ngurah. Tiang sane iwang nyangcang pawiwahanne sareng kalih saking sedih lan gedeg basang tiange. Tan
379
