palan tiange ipidan ngawinang. Tiang taler matur sisip. Kak Wira, Mamiq, lan Inaq duwenang ka lacuran dewek tiange." Kenten aturne Gusti Ngurah kapatutang teken rabinne pinaka baktine marerama.
"Tuagung, Bu Ratna sodaane sampun puput, durusang ngajengang dumun. Tunas tiang ngiring Gung Nantha," kenten aturne Meina lantas nimbalin okanne ajaka di terase. Ajaka nemnem mangkin ngajengang di kamar makan. Wayan Galang kanti buin mimbuh saking sedukne. Makejang amung madaar di Cakranegara dogen saking suntru manahne.
"Dik Ngurah, uli mara narima telepune Inaq lan Mamiq ten seleg madaar, pragat bengong teken cengah-cengeh yadiapin sampun orahang tiang deriki pada selamet. Ibi sanja Mamiq ajak Inaq jag sampun mamuuk ka Praya saha ngaba tas pakean nagih mriki. Telpon tiang Yan Galang masih patuh. Luh Ade sesai ngeling nagih atehang meriki. Nika mawanan mabarengan luas." Kenten ucapanne Lalu Wiradana masawang sedih.
"Wiakti, Inaq ten puas yen ten ningalin padidi kenken sujatinne sida makejang. Not-not tiang gumantine Gung Nantha rasa pagelantes uli kapale, nyemplung di pasihe. Adanne keneh, mula tusing eneh-neh yadiapin je kabaranga sampun selamet."
"Pateh, nika Luh Ade mara kabarin tiang jag ngeling muntag-mantig nagih mriki nelokin Tu Ngurah lan Meina. Pasirepanne Tu Ngurah jag gebura nganti Luh Purnama leleh nupdupang. Niki yen ten wenten pameriksaan di kantorne mirib Luh Purnama milu. Memek lan Bapan tiange nunden tiang apang enggal meriki. Sami titip salam kayang timpale ring kantor," aturne Wayan Galang. Suud ngajengang mangkin giliranne Made Sinar lan Meina madaar. Gung Nantha serahanga ring ibunne ane lakar majengin bubuh.
378
