taluh anggon ben bantene. Jam lima sore Ratna Dumilah sampun suud matanding. Meina nyiramin Gung Nantha. Gusti Ngurah sareng rabinne gelis masiram lan mabusana sawireh lakar mabanten. Gusti Ngurah ngalih toya anyar lan ambengan anggena maketis milehan di kamar-kamar, mara lantas ngunggahang pejati lan prani di plangkiran kamar baca, banten perani di pasirepan lan paon, canang di semer lan pamesu. Sesampune suud maturan lantas katerusang masaagan di kamar, di natah lan di lebuhe. Kaping untat Gusti Ngurah ajak rabinne muspa di kamar nunas panugrahan Ida Sang Hyang Parama Wisesa mangda ngicen kaselametan raganne sakulawarga magenah ring Umah Dines BRI ne. Wus punika lantas matirta, kayang Gung Nantha milu matirta tur masekar karna bungan sandat. Yadiapin saderana nanging cukup ngawe kayun sang wau prapta tentrem lan bungah. Pak Mustamar bengong ningalin tata cara selametan saderana cara Hindu ngulihin umah. Satmaka lanturan uli upacara syukuran cara Islame ibi sanja.
"Pak Ngurah napi bedanne syukurane ibi sareng selametane mangkin?"
"Ooh, syukurane ibi pinaka angayubagia sawireh tiang sampun selamet bebas uli bencana ane nibanin awak tiange saking panugrahan Allah/Tuhan Sang Maha Pengasih. Yen mangkin tiang sakulawarga nunas lugra, permisi teken panguasa sekala, niskala wawidangan umah
lan pekarangane niki saking pituduh Sang Hyang Widhi Wasa apang ten ngarubeda, pada rukun ngawawa uripe suang-suang," baosne Gusti Ngurah Darsana.
"Oh, kenten? Dadosne Agama Hindune percaya wenten mahluk halus, jin, setan, dewa-dewi mawanan di pura akeh wenten tugu, ngaturang sesaji ring punyan kayu, area, keris, kayang ubuh-ubuhan. Sapunapi kayuwaktianne nika. Ampurayang yen tiang matur papolosan,
371
