sampunang raosanga," kenten Lalu Wiradana nuturin saking aris.
"Beh, dadinne tiang sanget ngarepotin kak Wira lan mbok deriki. Tiang matur suksma banget. Rasa tan sida baan tiang ngawales swecan kakak ring tiang salawase."
"Nah, lamun keto tiang ka Rumah Sakit maiu ngidih ijin lan nyilih montor lakar mulih. Mungpung kari semeng melahan jani suba iraga ka Sengkol." Lalu Wiradana lantas pesu tutuga teken kurenanne magandeng nganggo sepeda ka Rumah Sakit Praya. Lale Dumilah makenyem maniiis gati tan mari ngecup gelanne.
"Oh, tong madaya belin tiange lan mbok Ayu ngelah pangrasa patuh buka i raga. Dumadak nyanan raganne nyidaang ngaluwesang panampenne mamiq lan inaq tiange jumah. Tiang sedih yen nganti mamiq ngelah panampen yen tiang anak durhaka, ninggal Adat lan Agama kadanin murtad lan sing patut maan Swargan. Tur kapegatin, kakutang sing keakon panak. Ah jering-jering bulun kalong tiange. Pantes ke meme bapa ane ngrupaka i raga lar-carya megatang lan mastu pianakne apang sing nemu swarga?" kenten Lale Dumilah lantas ngaba piring lan cangkir kopine kaumbah di paon.
"Pedas patuh, yen sing keto nguda ya raganne bani ngalih kurenan anak Bali ane malenan agamanne. Dumadak mamiq masih keto apang adil, sing nagih nyuang dogen nanging takut kelangan. Kaden tatujon tukade membah makejang masih ka pasih denda Ayu?" Gusti Ngurah ngulgul gelanne apang inget teken dugase ka Gunung Rinjani.
"Nggih, nggih Bli Gung. Tiang sampun ngerti, sampun tawang tiang uli muncuk Gunung Rinjanine. Kari sangsaya? Margi mangkin gelisang majalan, nggih dong." Lale Dumilah ngelut gelanne pesu. Gusti Ngurah amung kenyem bungah kayunne. Belinne saget teka ngarerenang montor di arepan umahne, lantas ngaukin adinne.
