"Kenken, suba sayaga? Ayo jani majalan, apang semengan teked di Sengkol. Ayu, ingetang ngaba pesenanne Inaq. Tumben nagih beliang krupuk melinjo."
"Nggih, niki sampun makejang bli. Margi Dik Ngurah, Denda Milah pada. Depin bibik apang ngijeng malu jumah." Ayu Sasih ngorahin pangempunne apang ngundebang korine di arep. Montore maseret pesu tur nganginang ngungsi margane ane ka Sengkol. Di jalan tuara med-med Gusti Ngurah nyingakin carike ane soklat tuh gaing lan tanahne belah-belah. Mula mangkin masan panes. Tukade pada ngetuh. Ujane bales ibi tuara nyidang ngemegin embunge. Kebo lan kambinge ane madang di carike ames ngamah somi lan punyan kedelene tuh. Ane kari gadang donne amung punyan bila, tiing gesing, lan bagike di sisin embung tongos kebone makipu. Ebuke makupuk, sabilang ada montor ngaliwat. Lale Dumilah lan Gusti Ngurah nekep cunguhne saling anggutin.
"Nguda dadi pada bengong, nggih dong tuturang kenken dugase kapale nabrak jembatan," kenten Gusti Ayu Sasih matakon medahang sepi, ngilangang bengonge.
"Oh, tiang kadung kadalon ningalin kebone makipu di raoke bek misi buk."
"Ha ha ha , dija wenten raok misi buk. Misi tain kebo ada ya. Yen tiang malah bingung, napi orahang yen inaq nganti ngopak yen nawang tiang orahang lakar nganten. Inget tiange uli cerik ten taen piwal teken anak tua, apa buin nglawan, sangkala makejang nyayangang." Lale Dumilah ngembeng-ngembeng yeh paningalanne.
"Nah, sangkala eda malu ngorahang apa-apa. Cukup Dik Ngurah ngorabang pamit lakar pindah dogen. Nyanan beliq malu nyelehin kenken papinehne mamiq indike yen saja Denda demen teken dik
29
