tikete patut sampun ngalapor jam 10.00."
"Nggih dik Ngurah. Insyaallah tiang maan ka Cakra kayang nika ngajak Mamiq lan Inaq. Dumadak apang ten kasep buin cara ipidan, ia Inaq?" Ucapanne Lalu Wiradana. Sesampune pada masalaman Gusti Ngurah lantas ngarerenang cidomone. Ratna Dumilah menek ngabin Gung Nantha, Meina ngaba tasne lan Gusti Ngurah menek sidori.
"Silak inaq, kak Wira, mbok Ayu tiang pamit. Daag Niniik, daah kakak. Nantha ngantos di Cakra, nggih, daadaah cup uaah," Ratna Dumilah masaang okanne, ulap-ulap. Ninikne amung kenyem milu ulap-ulap tan pegat ningalin cidomone sayan ngejohang.
Selidan Gusti Ngurah sampun teked di Jeruk Manis Cakranegara. Kabenengan amung Pan Kobar dogen ane ada jumah sambilanga ngecelin siapne di batan sandate. Meina ngenggalang ngejang tas pakeane lantas ka paon ngangetin bubuhne Gung Natha.
"Jro Mekel di paon dereng wenten jangan. Mangkin kari ngantosang Luh Ade. Ipun kari ka sekolah ngurusang Surat Katerangan Miskin anggen ngenepin mangda polih bea siswa. Yen ulam sareng ajengane dong sampun wenten," kenten aturne Pan Kobar.
"Nggih wak, tiang nak sampun nyampah i tunian di Praya. Niki amung ngaenang bubuhne Gung Nantha dogen sawireh sampun disne ngajengang kali mangkin. Nyanan tiang ja ngaenang jukut, lakarne sampun mategep ada di paon," raosne Ratna Dumilah, saha majengin Gung Nantha bubuh. Meina mesuang baju-bajune ane kotor lantas umbaha di kamar mandi. Suud ngajeng bubuh Gung Nantha sampun arip pesan saking kenyelne mamontoran. Gusti Ngurah nyirepang okanne di bale daja. Ratna Dumilah age ka paon ngae jukut lan ngoreng dengdeng kaok ane abana uli Sengkol. Pas suud ngae darang nasi Made Sinar teka uli sakolahan, magesoan masalinan lantas ka paon.
332
