Di Praya Gusti Ngurah ajak rabinne lan okanne ngarerep tuah a peteng. Agus lan Ayu liang pesan manahne ngempu misanne Gusti Ngurah Anantha Bhuwana satmaka adinne padidi. Makejang palalianne pesuanga anggona mawehweh Gung Nantha.
"Inaq, kenken kayun inaqe mangkin nyingakin Agus lan Ayu ngempu Gung Nantha adinne? Ada ke rasa mabeda-bedaan inaq macucu?" Aturne Lalu Wiradana iseng.
"Ah, nguda Wira ngomong keto? Apa kamu ningalin inaq medaang Gung Nantha teken Agus lan Ayu? Yadiapin kenkenang denda Milah tetep putringku, dadinne okanne ia cucungku. Patuh buka Wira tuah putrangku, dadinne anakmu ia masih cucungku. Apa ane nikaanga teken nak Gusti, saja beneh. Sing ada anak nyidayang megatang anak mapianak, manyama, sawireh anto madan magetih abungbung, tunggal ari-ari. Getih ane tuara ada bedanne. Yadiapin ia suba malenan agama," pasautne inaq Wiradana sendu.
"Kak Wira, sampunang ja malih ngomongang indike nika ngiring inaq, apang ten dadi sedih. Yen anak tuara ngalamin mirib bisa nyalahang inaq pinaka anak tua ane tuara mituturin pianak, utawi nyalahang iraga pinaka anak durhaka. Nanging yen kenehin ulian budi luhur, kadasarin ben tresnasih sujatinne cinta kasihe ngatasin saluiring tata titi tutur agama lan kapatutan. Napi buin yen ngomong indik keadilan. Kenken ke papinehne yen ningalin mangkin di keluargane niki ada anak muani Sasak makurenan ajak anak Bali, lan ada anak muani Bali makurenan ajak anak Sasak? Yen tilik ulian adat lan agamane napi ke makejang apang dadi Sasak, utawi makejang apang dadi Bali? Utawi matutang pilihan iragane anake luh patut nutug anake muani?" Aturne Gusti Ngurah teken ipahne.
"Sujatinne kayang mangkin pemerintahe dereng ada ngatur indik
330
