"Nah, kene Yan, muah Wak Ian Memek. Cuteting carita dr. Nurja sampun maan mulih di Baledan. Sasubane matemu ajak Meina lan memaca surat wasiate raganne ngakuin Meina mula pianakne. Raganne masih nyaritayang dugase ngajak Leonardo mai tur nyerahang teken wak lan memek nganggon panak madan Wayan Galang. Mangkin raganne kari ngutsahayang nyapsapang kurenan lan pianakne apang nyak ngampurayang raganne Ian narima Meina pinaka panak kwalonne. Raganne masih sanggup lakar meanin yen Meina nyak ngalanturang sekolahanne Masih ada salamne teken Yan Galang lan Wak ajak Memek makejang," kenten caritanne Gusti Ngurah negesang.
"Nah, yen dr.Nurja keweh nrima cening Meina, depang suba sepalan dini ajak memek. Ooh, dadi mamelas pesan kahanan Wayane manjatma, kaden ja meme bapan ceninge suba ngalahin karejek di Selong lantas pragat. Nanging ento mamak ceninge ane ngonyang-onyang lacure. Ngelah kurenan sing taen maang lega, mawanan ngalih lega saking silib ngajak dr.Nurja. Pamragatne dugas biure bapak ceninge ngalahin, memen ceninge ngungsi nyelametang raga, ngaba belingan mabelasan ajak cening, nutug anak ane sesai meres nguluk-uluk. Tonden melah mategtegan magae, saget uripne kacabut dugase Meina enu cerik Yen keneh-kenehang, meme suba sengsara malaib uli Bali mai saking ngambul, nanging Mamakmu buin sengsaraan kapegatan makejang-kejang," atur Wayan Rempuhe matanggu tanggis.
"Beh, beli Yan Galang lan memek pada. Sesubane tiang matemu ajak bapak tiange di Bali, lan dini matemu ajak beli, memek lan wak ane makejang nyayangang Meina, keneh tiange dadi bingung. Apa tiang milu bli Yan dini apa milu Bapak dr.Nurja. Masalahne tiang ten kari ngelah mama, lan nyama braya di Kupang tuara ada," ucapne Meina sajan-sajan bingung. Wayan Galang bingung, memenne buin sangetan
322
