Memek anak papolosan, terus terang nuturin apang pada ngerti teken keramaning luh." Wayan Rempuh milu maketur alon.
"Nah, yen kenten tiang luas malu Mek, apang selidan nyidang matulak." Lale Dumilah lantas pesu uli paon. Gusti Ngurah ka kamarne nyemak topi lan dompet. Made Sinar nyemak tas bukunne lantas marerod pesu ka rurunge kaiwasin baan memenne saking manah bungah angayu bagia "Dumadak pada nemu bagia." Di margane Wayan Galang matemu ngajak Made Artha lantas mabarengan nulak sepedanne ka kantor. Gusti Ngurah lan Lale Dumilah menek cidomo teked di penambangan. Made Sinar mabarengan ngajak timpal-timpalne majalan kasekolah. Sang kalih enggal menek bus ane majalan ka Praya. Napi buin mangkin mula pekenan Praya, liu sodagar lan dagange matendakan meli siap, bebek, taluh, babijan kacang ijo, kedele. Ada a jam makelonne mamontoran sang kalih saget teked di Praya lantas ngojog umah belinne. Dapetanga ipahne Gusti Ayu Sasih mara mataki-taki lakar masuk. Belinne mara mulih uli majaga di RSU Praya. Kaponakanne maka tatelu sampun masuk kasekolah. Lalu Wiradana makenyem ningalin adinne teka ngajak gagelanne Gusti Ngurah Darsana.
"Oooh, Denda Milah ja teka. Kenken tumben semengan mulih, sing kuliah? Dik Ngurah tumben milu, ten ngantor?" kenten Lalu Wiradana saha nyalamin tamiunne.
"Ooh, tiang gumanti malali, mungpung kari cuti. Meled apang nawang umah kakak Wirane deriki. Ipidan dugase ka Kuta ten maan singgah meriki." Gusti Ngurah lantas malinggih di kamar tamu. Lale Dumilah nututin ipahne kapaon nyediaang kopi.
"Mbok Ayu ten masuk mangkin? Sampun tengai kari jumah?"
"Masuk, nguda tusing. Beline mara mulih uli majaga. Sajanne Denda mulih, ada kaperluan pipis? Utawi mula lakar mulih ka Sengkol
