nunas bekel teken Mamiq?"
"Mula malali, nyambil ngatehang Gusti Ngurah apang maan pamit teken beli lan mbok, saha Mamiq di Sengkol. Raganne lakar pindah ka Atambua tanggal satune niki."
"Kenken sujatinne Milah, apa sajan magelan apa masawitran ajak dik Ngurah?"
"Nggih tiang mula majanji, nanging bingung mawanan mulih meriki lakar nunas tatimbang teken mbok," kentan Lale Dumilah lantas ngaba kopine ka kamar tamu.
"Dik Ngurah, kone lakar pindah ka Atambua. Pidan lakar luas? Majalan uli deriki napi singgah malu ka Bali?" Gusti Ayu Sasih matakon lantas bareng negak.
"Pindah? Bah dereng ada duang tiban saget pindah. Buina di Atambua joh gati di Timor, paekan ka Australia," kenten Lalu Wiradana matadah bengong nolih adinne.
"Nggih kak Wira, mbok Ayu. Nadak pesan, tiang kabenengan mulih cuti ka Bali bakat iseng malali ka Denpasar, jag maan surat pindah ka tanggun gumine kangin nyumunin tanggal satune niki. Kocap apang pada nawang panes tis gumina derika."
"Nggih ten kenken. Mungpung kari bajang, bayu kari gede. Perlu ngalih pangalaman. Buin pidan yen sampun nganten, ngelah panak mara perlu ngalih tongos ane melahan apang nyidang pindah ka Bali utawi ka Jawa apang elahan masekolah."
"Nggih, nika awanan tiang meriki apang maan mapamit teken kak Wira lan Mbok Ayu deriki. Sajawaning nika tiang masih apang maan mapamit teken Inaq lan Mamiq di Sengkol. Tiang mangkin luas joh tur dereng karuan kija buin lakar pindah salanturne. Nika awananne tiang
25
