mapeluk-pelukan nangis.
"Ibu, yen Ibu kayun ngiring sareng ka Rababima. Titiang mrasa durung cukup malajah dados anak tua. Napi malih mangkin sampun wenten putune, napi nenten Ibu kangen nyingakin kenyemne Gung Nantha?" Aturne Ratna Dumilah mamelas.
"Ibu meled milu Ratna, nanging kahanane jumah suwung pang ada masih tongos nyama brayane matakon. Buin pidan yen suba pindah ka Bali ditu Ibu milu klecag-klecig nelokin cucu. Jani selegang teh ngempu panak, ngayahin rabi apang adung sotaning alaki rabi. Loro-loroning atunggal, salunglung sebayantaka pinaka pawakan Arda Nareswari."
"Bu Ratna, toya angete sampun wenten. Tunas Gung Nantha jaga siramin dumun. Wedange di dapur taler sampun seduha ring mbok Pudak, silakan Gek Sri makta ka bale ah ... gunung rata," kenten aturne Meina lantas nyangkol Gung Nantha lantas siramina. Gek Sri ngenggalang ka pawaregan nyemak wedange abana ka gunung rata, tutuga teken Gek Darsini ngabaang jaja laklak lan lukis mawadah nare. Ratna Dumilah kenyem-kenyem ningalin laklak dademenanne. Sepanan nanjenin sampun duang tebih telahanga.
"Nggih rarisang dumun ngawedang Bu, Mbok Ratna lan Bli Ngurah. Niki laklak magula katengah. Jaen Mbok? Yen di Sasak biasanne iraga meli serabi. Tiang kari ngae nasi goreng malu ka paon," kenten Gek Sri lantas mabalik buin ka pwaregan ajak rainne. Uli jabaan saget rauh Gusti Biang Suci nyuun sokasi misi taluh lan wohwohan, sareng rabinne Gusti Ngurah Gede natad keranjang misi siap potong lan dolong mawadah kisa.
"Beeeh, Ibu ja rauh magrendotan sareng Aji. Kali napi mamargi Bu? Gek Darsini maosang nyanan utawi benjang semeng. Manawi repot pisan madolan nggih Bu, Aji?" Aturne Gusti Ngurah ngenggalang
292
