maan nunas pipis dogen ha ha ha."
"Napi nika salah, Bli Ngurah, tiang mulih mriki ngaminggu? Kaden Gek Darsini ane sampun sesai nulungin Ibu ajak Aji derika. Napi ten senengan Ibu di Janaloka?"
"Ah sajaan Tu Gek Darsini, padalem Ibu deriki ngaraga di Jero," ipahne nyelag.
"Nah sing kenken, Ibu sing kasepian kok. Malah dini sesai rame ben anak cerik-cerik. Yen cening ajak dadua ngaminggu mulih suba cukup. Pokokne cening nyak seleg malajah apang enggal tamat dogen Ibu suba lega. Kaden dugas beline enu masekolah di Bali masih kapah mulih. Apa buin jani? Gumantine apang pada rahayu, kicen seger oger. Subaktine marerama sing ja ben nongosin jumah sesai cara bedogol. Ibu suba tua, patute cening jani ngutsahayang malajah, ngalih gae, apang iraga enu hidup. Inget Ibu teken tuturan beline dugase mamengkung nagih masuk ka Buleleng, madasar ben tresna bakti. Ben belog lan lacur Ibune sing nyidaang mekelin, kanti entungin Ibu pipil carik asikut apang ulehanga padidi nyangonin raganne. Takonin ento beline, ditu abete malajah yen cening makeneh apang nawang ane madan hidup madasar uli lacure kapati-pati," kenten pandikan Ibunne saha paterebes toyan panonne mituturin okanne makejang. Gek Sri, Gek Darsini, kayang Ratna Dumilah lan Meina engsek nguntul ten bani masaut.
He he he, nguda dados serius kanten? Ibu sampun tuyuh miara titiang sami, yen mangkin wenten Gek Sri lan Gek Darsini malomba mamanah ngurus anggan ibune nika tan iwang. Yen wenten galah becik taler Ibu iring tiang ring kota genah tiange makarya. Banggayang anak- anak Ibu sane ngurus jumah kapah-kapah. Ipun sampun kelih-kelih," aturne Gusti Ngurah saha meluk ibunne kasih-asih. Ratna Dumilah milu ngetelang yeh panon saha milu meluk matuanne. Pamuputne makejang
291
