tanggal 2 nganti tanggal 14. Serah terimane di Rababima mara tanggal 16," kenten Gusti Ngurah.
"Ooh, syukur Tuagung, oh Gung Nantha iraga payu nelokin Ninik nggih sayang. Ibu masih lakar nunas pangampura teken Papuq. Raganne sampun mebasang iraga mulih. Gumantinne iraga angayubagia ring Sang Hyang Widhi ngicen ajine kapercayaan pangkat lan jabatan apang nyidaang mayadnya ring wangsa, negara tur nincapang idup iragane," kenten Ratna Dumilah saha ngecup rabi lan okanne tan mari ngembeng- ngembeng yeh panonne. Gusti Ngurah tan lali angayubagia ring Sang Hyang Widhi Wasa.
"Denda, apa ane teriman beli jani, pangkat,jabatan, kayang rezeki tuara lempas masih saking doa lan lascaryan Ibune ngurus umah, panak, somah, lan saurah arih tingkah manyama braya. Adung iragane makurenan ane ngawenang keneh tiange tis magae. Apa ane daar iraga maan ulian tuyuh, boya uli tan rahayu, mawanan pulese entil," kenten pandikanne Gusti Ngurah lantas masalinan. Ratna Dumilah pesu nyerahang okanne teken Meina ane sedeng masedia di kamar makan sawireh tuanne lakar ngajengang.
"Bu, wenten napi dados sakadi garjita Tuagung rauh uli kantor?"
"Ooh ento, cutinne Tuagung satujuina. Iraga payu lakar mulih ka Bali ngaenang otonan Gung Nantha. Nah, ajak malu Gung Nantha,buin jebos ajaka nyen marembug," raosne Ratna Dumilah masemu guyu lantas ngajengang sareng rabinne. Meina nyangkil Gung Nantha katerase ngetis. Angine sumilir ngampehang bon maware di pot bungane miyik ngalub. Suud ngajengang Gusti Ngurah ajak rabinne masih milu ngetis di terase.
"Bu, Gung Aji, yen durus cuti malih pidan jaga lunga ka Bali?" Aturne Meina.
273
