teked di jeronne. Meina ngenggalang mapagin sayaga ngaba susu anget kanggen Gung Nantha. Giliran mangkin Meina ane ngempu okanne negak di sisin telagane. Gusti Ngurah sareng rabinne sesampune mresihang raganne di kamar mandi lantas mabakti, nunas pangampura lan karahajengan jagate ring Sang Hyang Widhi Wasa. Mara lantas Ratna Dumilah nyiramin okanne. Gusti Ngurah wenten dogen kripitanga, di kenkene mresihin telaga ajak pak Yosef, mamula bunga- bungaan, taneman ubad, jukut-jukutan, minakadi miara wohwohane ane tumbuh subur ngarembun mabunga, mabuah pagulanting. Saking anteng tanemane mabunga, kapah pesan Meina meli bunga anggon ngae canang maturan sesai. Kayang sayuran lan lalaban mepes masih ngalap di natahe.
Pas tanggal nemlikur Gusti Ngurah nerima telex uli kantor daerah ngabarang indik raganne ngawit tanggal satu kapindahang uli Atambua ka Rababima. Ane ngentinin masih timpalne ane dadi wakil di BRI Banyuwangi. Raganne angayubagia wireh maan mimpin cabang ane gedenan, nanging kenken ben izin cutinne, yen serah terimane di Rababima mapaekan teken oton okanne? Apang pasti, ten ngae bingung Gusti Ngurah nelepon Bapak Kakanda di Denpasar nunas patunjuk palaksanaane ane melah.
Daging pamutus saking Bapak Kakanda, cuti tahunan Gusti Ngurah kaputusang tetep uli tanggal 2 nganti 14 Agustus ane lakar teka. Serah terimane kalaksanayang tanggal 16. Salawas raganne cuti, Pak Kakanda lakar ngirim staf kantor daerahe ane ngawakilin. Gusti Ngurah liang kayunne, tan mari matur suksma pisan ring Pak Kakanda ane ngicen galah mantuk malu saderenge matugas di Rababima. Raganne majanji lakar ngalaporang sapari indik ane sampun kalaksanayang di Atambua tiosan teken laporanne sane resmi. Sejabaning nika raganne masih
271
