Kayang Buda Wage Klawune niki jangkep sampun nem sasih yusanne Gusti Ngurah Anantha Bhuwana. Patut sampun kakaryanang upakara paotonan utawi odalan. Gusti Ngurah sareng rabinne sampun adung pacang ngarya upakara odalane di Baledan, sapisahan apang polih nelokin matuane, reramanne Ratna Dumilah di Sengkol. Mangkin kadi daging suratne Lalu Wiradana ngaptiang yen Gusti Ngurah Darsana polih cuti apang simpang ka Sengkol ngajak Ratna Dumilah lan okanne Gung Nantha. Mamiq lan Inaqne sampun ngampurayang indike mararik riin. Nika awanan raganne ngajuang surat izin cuti tahunan suenne roras dina saking tanggal 2 ngantos tanggal 14 bulan Agustus ane jaga rauh. A minggu kanggen ring Bali lan malih aminggu kanggen ring Sasak.
Katuju dina Minggu kadi biasane Gusti Ngurah ngajak rabinne nruput sampun jalan-jalan di margane ngempu okanne ngalih angin semeng ane nyeng nyusup raganne saling genti ibu kalih ajinne norong kretane. Gung Nantha kenyem-kenyem, mrengang panyingakanne nyingakin punyan kayu di sisin margane, ambubune putih ngalayang joh di langite. Timpal wiadin kenalanne ane mapapas makejang nguihang tan mari nundikin okanne, ngajumang Gung Nantha wiakti seger oger tur someh teken sira ja ane nakonin.
"Bu, dumadak apang satujuina cutin tiange buka pinunase duang minggu. Perlu rasanne uli jani ngalih-alihin barang asli Timor anggon gapgapan mulih."
"Sampun Tuagung, tiang numbas kain tenunan deriki wenten dasa potong. Yapin dasar kaine kirang becik, nanging motif lan warnanne leteng pisan. Ten wenten di Bali lan Lombok. Mirip gringsing Tenganan," pasaut rabinne alon saha melokang kretane ka sisi sawireh sampun
270
