"Inggih, Tu Ngurah sampun selamet, nanging tan urungan taler durus pindah. Sira iring titiang mangkin magegonjakan, tunasin sasuluh lan tatimbang sareng samian. Manawi durung janten yen amasa jagi kapanggih malih,"kenten aturne Wayan Rempuh.
"Mula kenten Mek. Sotaning dadi pegawe pemerintah patut satata manut teken pimpinan dija ja tugasanga sawireh Indonesiane niki ten ja amung Jawa, Bali, Lombok dogen. Nanging uli Aceh teked ka Irian, uli Manado teked ka Sumba lan pulo Rote. Niki kabenengan pesan tiang maan malali keliling Indonesia saking tugas pemerintahe." Gusti Ngurah tan mari ngusuh-usuhin Lale Dumilah ane sayan nguntul ngepes yeh paningalanne. Nepen pesan buka omonganne ngajak Luh Purnama ituni sanja.
"Inggih, kangge dumun asapunika, nyanan malih lanturang. Mangkin ngiring ngajengang dumun. Niki Luh Purnama lan Made Sinar sampun masoda." Kenten Wayan Rempuh saha nyacarang ajeng-ajengane ane abana uli paon teken pianakne.
"Beh, kaden tiang mara pesan naar bubuh apiring di RSU, rasanne kari wareg. Lautang sampun Wak, Memek, lan ane lenan madaar. Padalem uli tuni makenta saking repot ngarewangin tiang di Rumah Sakit."
"Tu Ngurah, yadin sampun ring rumah sakit, mangkin malih dagingin. Napi to cicipin mangda sareng marame-rame, satmaka anggen selametan," kenten Pan Kobar saha nyemak piring isinina nasi lan darang nasine sapisan.
"Nggih ja ngajeng, nyak abedik ten kenken anggen nyuksmayang Luh Ade lan Luh Purnama sampun tuyuh nyediaang. Yen Tu Ngurah ten, tiang masih ten nyak." Lale Dumilah ngasih asih lantas nyodaang nasi abedik isinina be ane mula kasenengan gelanne. Salanturne
15
