yeh pasih lan angine baret buka jani. Patuh buka pelabuhan Bulelenge di Bali, masih mepes ngalapang sawireh ten ada ane nawengin," kenten Gusti Ngurah nyaritayang pangalamanne das dadi caru di arungan pasihe.
"Inggih Tu Ngurah, nika awananne Pamerintahe sampun sayaga ngawangun pelabuhan ring Lembar anggen ngentosin pelabuhan Ampenane puniki. Mangkin sampun puput tur sampun wenten kapal sane malabuh ring Lembar. Listrik sampun ngaranjing, mangkin kari mindahang Kantor Syahbandare lan kantor minekadi isin gudange siosan. Dumadak bayane puniki dados imba tur panelas kapale sane malabuh ring Ampenan." Pan Kobar milu nembungin ngadu rerekon.
"Nanging Wak, tambis Tu Ngurah ane dadi caru. Cara Bli Wayan Linggarsana ipidan, ilang tan pawatangan kayang jani," kenten Luh Purnama masaut sada sendu.
"Naah, eda ja nundunin ingetane ane suba lawas. Ida Sang Hyang Widhi enu madalem tiang, apang ada anggon tuturan di kaduriane. Gumantinne apang Pamerintahe nawang kapok, yen pelabuhan Ampenane ento sujatinne liunan bencananne katimbang teken pikolihne," keto Gusti Ngurah nyapsapang Luh Purnama ane masebeng sendu.
"Sujatinne Gusti Allah kari madalem awak tiange apang tusing balu di andungan, utawi dadi isin kamar sakite di Selebung. Tiang pasti tusing kuat cara Luh Purnama." Lale Dumilah nyahutin saha ngisi tanganne Gusti Ngurah sambilanga ngeling cara tuara lakar elebina buin. Wayan Rempuh kangen ningalin sang kinasih kalaran. Bas mara raganne madan rumaket ngempahang tresnanne, mangkin saget lakar mabelasan saking pindah makarya. Legayan rasanne yen sang kalih nganten malu mara lantas lunga.
