janine tiang sing pantes nerima, sawireh Cik enu kuangan pipis anggon mragatang utange. Sujatinne tiang mara bungah yen usaha lan kredit Cik Amione nyidayang lancar. Ento artinne sing pocol pimpinan tiange ngejang tiang dini, keto dogen."
"Nggih terus terang Pak Ngurah, utang tiange niki sujatinne telung juta anggona teken nyaman tiange di Surabaya. Ia majanji lakar nyicil sabilang bulan satak seket tali, nanging kayang jani dereng taen mayah. Nika awananne tiang ka Surabaya nagih. Beh, asilne tuah niki a juta doang. Kong supigi sana-sini nyilih duit, abis sing maan apa. Ngaba barang ka Surabaya tonden maan bayaran. Ongkos buruh masih enu ngebon, bayar sitik-sitik kanggo meli beras doang. Jani terserah Pak Ngurah, tiang sonurutang."
"Cik Amio, yen tilikin tiang uli kapasitas gudang, pabrik lan pamupun carike ane ngasilang padi, lan bebijan lenan miribang tusing merluang kredit nganti dasa juta. Mirib yen nem juta dogen sing telah ben mlanjaang. Apa buin jaminane paspasan."
"Nggih sujatinne tiang merluang limang juta doang, nanging nyaman tiange ane nganggon tigang juta lan dadi ongkos ajuta. Payu beliang tiang truk aji duang juta." Cik Amio nguntul sedih. Tumben mangkin ia mara nuturang sujatinne pejalan pipisne.
"Nah, yen keto ene madan salah sasaran. Pipise ane dasa juta patutne anggon modal kerja, salah anggon nombok, modal investasi truk, lan ada nempil, nem juta. Dija ngalih untung muterang pipise petang juta doang? Yen Cik Amio setuju, melahan truke adep. Ulehang apang sisan utange enu nem juta dogen, mara dadi uadang buin a masa gumentos pipise ane di Surabaya bakat. Nah ene pipis Cik Amione ne ibi ulihang tiang anggon ngentugin setoran kredite. Melahang moraan apang nyaman Cike di Surabaya ngerti teken kasulitan Cik Amione dini.
193
