Kaca:Gita Ning Nusa Alit.pdf/196

Saking Wikisource
Kaca puniki kavalidasi

Yen suba lancar pidan buin limbakang usahana.

Enu liu wawidangan gegaene ane dadi jemak sajabaning asil bumi. Dini ada kayu cendana, gaharu ane arum melah anggon barang kerajinan. Di Bali liu ada tukang ukir ane kuangan gegaen. Bandingang teken ngirim kayu ka Bali ane liu ngonyang ongkos lan dadi obyek korupsi lan pajak siluman, melahan nekaang pangrajin uli Bali apang magae dini. Bungkil kayu kayang akahne ane tusing maguna dadi pilah-pilaha anggon togog gaya Cokot. Tampalan lan serbuk gregajine dadi anggon dupa. Cik Amio ngembulanin aji kayu lan tongos magae. Batinne sasubane ngitungang kembulan lan beaya lenen dadi bagi asil manut perarem. Nah, kenken Cik?" Gusti Ngurah nuldulin. Sebengne Cik Amio masriak galang, dadi kenyem saha ngusap-usap peluhne dingin.

"Pak Ngurah, yen nika dados tunas tiang matur suksma. Tiang lakar ngadep truk lan nelpon nyaman tiange apang ngutsahayang pipis sacepetne. Beeeh, tiang lek pisan ngaturin Ibu amplope niki, yadin sujatinne saking tulus pang wenten anggen persiapan nyambut putrane lahir. Ten ada maksud tiang nombok Pak Ngurah."

"Aaah, yen unduk ento jani tonden perlu. Buina biaya ngalahirang mula ada uli dines. Sanget perluan Cik Amio anggon mragatang utange. Sajawaning ento pangidih tiange eda pati maang pipis teken pegawe utawi kurenanne yen maurusan kredit di BRI. Apang sing biasa calep, mara gasa magae yen ada komisine. Kaden ento mula tugasne, ia dadi pegawe suba maan gajih? Nah yen katuju nasabahe mapikolih, mula ulian tulus maang bantuan yen ada pegawene mean musibah, ada acara selametan, nah kasukserah asal tan pamerih. Unduk tenenan iraga patut saling ajinin swadharmane suang-suang."

"Nggih, nunas maaf, ampurayang kebiasaan tiange belog tan nolih sapa sira," aturne Cik Amio saha nyelepang amplope ka kantongne.


194