teken Ibu Endang. Sopir lan satpame masih menek sayaga lakar majalan.
"Nggih, Pak Ngurah, selamat jalan ngantos benjang tiang merika nyaksinin serah terimane ajak timpal-timpale sapulo Timor ka Atambua," salamne Pak Endang Winata saha menekang limanne ulap-ulap. Montore maseret ninggalang umahne sayan makelo sayan joh nincap margane bengang di sisin kota Kupange ngungsi kota Atambuane. Sopir lan satpame ane madan David lan Alex tan pegat-pegat nuturang adan desa-desane ane kaliwatin. Yen nepukin pemandangan ane melah Gusti Ngurah nunden sopire mareren sambilang ngetis nginem yeh lan naar roti ane bekelina teken Ibu Endang. Liu masih ane katon ngulangunin, yadiapin hawane panes sampi lan jarane masih itep ngamah padang. Kambing lan gibase mapunduh-punduh angan satus ngalih amah di sisin tegal lan carike nganggut don kayu tuh wiadin padang ane sayan soklat. Pangangonne amung negak di batan kayune nganggo capil gubang ngarebreb nawengin muanne. Angine makesyur alus ngampehang ambun kayu cendanane miyik kakosod baan kebone ane mara suud makipu.
"Pak David, apa punyan kayune ngarembun tenenan punyan cendana?"
"Nggih, nika awananne mara kosod kebo bunganne ngesyur mabo miyik," kenten pasautne David nganggon basa Indonesia matadah kasar ogatne asli Pulo Timor. Gusti Ngurah makenyem eling teken timpalne dugase masuk di SMEA Singaraja ane madan Emanuel Eno. Rabinne masih milu makenyem saha nimpalin ngobrol tan mari ngenjuhin jaja roti, buah apel, lan jeruk. David lan Alex amung nyemak roti manise pada mabesik.
"Kenken, ten demen teken apel lan jeruk pak David, pak Alex
152
