TRAGTAG LANTANG
Sesampune kapale malabuh. Panumpange pesu ngojog ka buse ane lakar ngaba ka panerimaan barang aba-abaane di pelabuhan. Gusti Ngurah nandan rabinne ngalih barang -barangne kumpulanga dadi abesik taken buruh pelabuhane, pesu nganggo kereta dorong. Teked di pamesun pelabuhane dapetanga Kepala Cabang BRI Kupange sampun teka ngajak sopir montor BRI Cabang Atambuane ane lakar mapagin. Gusti Ngurah lantas masalaman pada saling kenalang rabinne suang- suang. Kenten masih sopire ane mapagin milu kakenalang. Raganne nyampeang pabesen yen Pak Abu Galib, Kepala Cabang Atambua repot nyediaang risalah serah terima, mawinan raganne ten sida milu mapagin Gusti Ngurah. Sopire menekang barang-barange makejang ka montore. Sampune mayah ongkos buruh makejang lantas pesu uli lapangan ngojog kumah Kepala Cabang BRI Kupange, Pak Endang Winata anesampun sayaga namiu Gusti Ngurah ajak rabinne.
"Margih ngajeng malu seadanne Pak Ngurah, Bu Ngurah, sawireh pamargine ka Atambua kari joh sawat. Sanja mirib mara teked derika." Ibu Endang nanjenin tamiunne Sopir lan satpame masih kasediaang madaar di meja makan di dori ajak sopir Kupange.
"Oh, nggih, matur suksma Bu, Pak Endang. Tiang sampun ngarepotin Bapak lan Ibu mapagin di lapangan. Mangkin nunas nasi buin deriki," pasautne Gusti Ngurah alon. Makejang mangkin madaar saha mareraosan indik kawentenan bank lan kota Kupange. Suud ngajengang lan ngawedang Gusti Ngurah mapamit lakar nerusang ka Atambua.
"Pak Endang, matur suksma. Mangkin tiang mapamit apang ten petengan teked di Atambua. Tiang tumben meriki, perlu madeng- adengan majalan apang tatas tawang gumine deriki." Gusti Ngurah ngajak rabinne menek ka montore. Makelo Ratna Dumilah mara lebina
151
