"Inggih Ibu, Aji, Gek,tiang pamit. Luh Ade selamet lan salam taken beline lan Luh Purnama. Melahang melajah apang enggal lulus lan seleg ngayahin anak tua jumah." Kenten Gusti Ngurah lan rabinne lantas makaad nututin anake ane lakar boarding manek ka kapal tarbange sawirah sampun umumanga uli pangaloana. Sang katinggalin lantas masih pasu ngojog montore ane ngantiang di sisian. Kapal tarbang Marpati Nusantarana nambung ngambara nembus langite biru ening beneng kangin mapag suryane mara dauh kalih. Ratna Dumilah ajak rabinne matolihan tuun. Lapangane, gumi Badunge lan kotane sayan makelo sayan katon rawit ngajohang. Amung garungan kapale kapireng sayan tegeh sayan dedeh satmaka kadis makeber, makampid nanging ngoyong tan pakebehan.
Pramugarine teka magiang kotak jaja lan inum-inuman kanggon sarapan. Gusti Ngurah nagih kopi nanging Ratna Dumilah nagih teh manis. Makejang panumpanga pada sarapan. Gunung Agunge kanten rawit nyiriang gumi Baline sampun ajoh. Mangkin ngenah gunung Rinjanine tegah manginggil nyiriang kapal tarbange sampun ngungkulin gumi Sasake pas duur desa Sangkole, sawireh teluk Kutane ngenah ngangkang badelod.
Tu Ngurah, rasanne niki iraga sampun duur umah tiange. Mirib inaq lan mamiq tan tau yen iraga ada di duurne. Oh, Inaq ampurayang tiang dereng sida makabar mulih."
"Beneh sayang, dumadak inaq marasa lan inget yen iraga ngoraang lakar luas ka Atambua dinane jani. Dumadak rasa asihne patuh taken iraga jani ningalin kapal tarbange tenenan uli beten. Patuh cara dugase iraga makaad uli Seleparang i pitung dina." Gusti Ngurah ngelut rabinne saha matujuang pulo-pulone sambeh di pasihe cara bebek ngalangi. Mangkin gunung Rinjanine rawit lanying alah tumpeng
148
