"Inggih Ibu, piranti umah dinese mula sampun tegep madaging, nika mawinan titiang makta panganggo kewanten acukupan," Gusti Ngurah nyelag matutang rabinne. Rai-rainne lan Made Sinar iteh ngorta, nuturang kaluihan panorama semengane galang kangin macampuh taken sayonge mampeh ngasab ngawe samar saru damuhe di padange. Jam enem montore singgah di penambangan Klungkunge nuunang muatan lan menekang muatan ane milu ka Denpasar. Buin montore nambreng sarat ngaba muatan saling paliwat apang enggal teked di Denpasar. Jam tengah kutus montore teked di Kreneng. Sesampune nuunang muatane lantas buin ngulahang ngebut apang enggal teked di lapangan terbang. Gusti Ngurah ngulahang tuun maluan lantas naftarang tiketne saha barang bagasane ane maba ka Kupang. Sesampune pragat madaftar, Gusti Ngurah lan rabinne lantas nunas mapamit taken ibu lan ajine, muah Made Sinar lan rainne maka dadua.
"Ibu, Aji, Gek ajak dadua lan Luh Ada, tiang pamit. Yen sampun rauh, enteg di Atambua tiang gelis makabar mantuk." Gusti Ngurah Darsana lan rabinne padelengdeng toyan panonne; ngelut lan nyalamin raine lan Made Sinar ane milu sedih, tur bengbeng.
"Selamet jalan beli Ngurah, mbok Ratna. Ingetang ngabarin mulih yen ngidamang salak muah buah ane ada di Bali. Pasti kirimang tiang apang bayine buin pidan ten macehceh," kenten aturne saha ngelut ipahne kadopdop kadimanin saking welas asih.
"Nah, mejalan cening apang melah. Ibu lakar mulih sambilang ngateh adine malu ka dununganne. Ingetang masih cening makabar taken inaq lan mamiq di Sengkol yen cening suba teked di tongos ceninge tugas. Ibu masih lakar mulih malu ka Sasak bareng ajak Pan Kobar, sambilang mataki-taki lakar mulih ka Janaloka nongosin umahe suung."
147
