bedile pacederder otomatis pesu uli larasne.
"Aah, ten kenten Gung. Mula tiang nyepi. Mulih uli Sasak dogen
sasiliban. Sira ten ada timpale ane orain tiang, napi buin ten tawang dija
timpale jani pabelesat sajaba ane kari jumah. Dadi Gung nawang, sira
ane ngorain?" Gusti Ngurah mabalik matakon.
"Ada, timpal pegawe BRI tuni tepuk mapayas ngaku lakar nelokin
Ngurah meriki. Nika awanan tiang ngalih timpale lenan apang ada
ajak mai. Lek yen padidi, sangkala kanggoang majaler apang saruan
kadenanga lakar malali ka Pasar Agung, ha ha ha."
"Nah, matur suksma sampun teka. Niki kurenan tiange Ratna
Dumilah, ampura dereng caluh basa Balinne." Gusti Ngurah ngenalang
rabinne lantas pada masalaman.
"Ah, yen soal basa dadi plajahin. Yen cinta ane mimbuh wajah ayu,
mara keweh. Yen ten jodoh, cara deweke kayang jani sing ada ngugu,"
Wayan Laba masaut nyelag.
"Nah suba eda nyelsel, tingalin ento enyen ane teka," kenten
timpalne matujuang Gusti Ayu Sri ajak panyeroane teka ngaba kopi lan
jaja. Enggang, gaok tamiune ningalin kajegegan peladene ane mapayas
makamben endek dadu maya mabaju kebaya ijo nguda.
"Niki adin tiange ane di Sasak. Mangkin kuliah di Kedokteran Unud
semester I, masak Gung Ngurah ten taen nepukin di Kampus? Tiang
maan ka Kampus nelokin mara niki, nanging Gung ten ada. Tiang masih
engsap ngorain yen ada timpal di Kedokteran."
"Ooh, niki ten Pak Gung Ngurah Usadhi senior ane paling galak
teken mahasiswi. Beli Ngurah, tiang taen maan hukuman ngejuk katak
di kolame. Kabenengan tiang biasa ngalih katak, ngalih balang lakar
baang kedis dugase di Tanjung, dadinne ten takut buin," kenten aturne
143
