Suud madaar, ngajengang truna-trunine lantas matetamped
mabresih-bresih, mara pada mapamit budal. Gusti Biang Ngurah ten lali
mungkusang jaja, woh-wohan ane kari masisa kanggon truna-trunine
ane tuyuh nulungin raganne magae nganti pragat. Gusti Ayu Sri lan
rainne sampun tuara taen mapayas, lantas ngenggalang ka kamarne
masalinan.
"Ibu, tiang ongkeb pisan, kewaregan. Ten taen jaga magentos baju
dumun, Bu?"
"Nah, Geg. Lamun tusing nyidayang, dadi suba jani magenti.
Miribang tusing ada tamiu buin teka. Nanging yen cening Ngurah ajak I
Ratna taanang buin jebos. Nyen nawang ada ane teka nelokin nganten,"
kenten ibunne saha menain bungane di pusungan mantunne. Anteng lan
kamenne masih patut-patutanga saking rasa welas asih tur bangga.
"Inggih Ibu, titiang taler kari demen mapayas sapuniki. Tumben,
wau kasidan manah titiange ngangge payas agung. Saking durung kenal
ring Tu Ngurah tiang sampun nyobak nyaluk pakaian Bali ring sekolah,
nanging ten sapuniki," Ratna Dumilah kenyem saha nandan rabinne ka
merajan."Ngiring ngarya poto ane becik deriki Tu Ngurah."
"Nah,jalan. Apang cara anak mara tuun uli merajan. Denda ngaba
bokor wadah bunga lan tirta." Gusti Ngurah ngambilang rabinne bokor
patirtaan lantas ngalih tongos masanding alep danglep di undage.
Tukang potrete ngatur ngalih alingan ane melah.
Suud mapoto saget teka timpal-timpalne ajaka tatelu uli Klungkung
uyut nguel sawireh tuara maan khabar napi malih undangan.
"Beeeh, dadi ati Ngurah nganten tusing matuturan. Engsap
pesan teken timpal ajak lacur di pedesanan. Tiang sakewala maan
tepuk dogen kanggo. Kadung ja tusing maan nasi, kopi lan roko, sing
kenken," kenten raosne nyrocos ten dadi tambakin, satmaka mimis
142
