Darsana masih milu nyiup komohne ane sediaanga teken rainne.
"Wiakti Ibu, basan timbungane niki atep pisan, dagingne taler gebuh," kenten atur mantunne mara maan nyicipin isin paan dolonge. Ajinne buin menekang sesate lan timbungane ane masisa nganti telah. Mula ukuranne, sate lawar telah, nasine masih onya. Apang ada garanga teken cicinge makejang nyisaang nasi pada masopan apang aledane ilid, tusing elad amah ulad alid.
"Sapunapi antuk ngajengange?" Gusti Biang matakon mara pada macanegan.
"Inggih, sampun usan. Ngiring tedunin dumun," makejang lantas tuun mabaseh.
Sesampune suud ngajengang makejang patulunge mapamit budal. Panyeroane matetamped saha nyampat di natahe. Gusti Ngurah ajak rabinne, saha rai-rainne magilihan pada masiram sawireh sampun nyaluk sanja. Suud masiram, lantas muspa maning-ening. Ibu lan ajinne milu mabligbagan malinggih di gunung rata ngajak oka lan mantune makejang. Rame pasaleng saurin magegonjakan saling tembungin antuk liangne.
"Ning Ngurah, sajaba krama banjar lan pasemetonane ane suba undang Ibu, ada akuda tamiune teka nelokin nganten ane suba endekang cening apang rauh dinane mani?"
"Ngantos mangkin meh wenten petang dasa diri, timpale sane nampek-nampek deriki. Ten uningin nyanan wenten malih sane rauh. Banggayang titiang mula nyepiang."
"Ibu masih keto, ngoraang teken nyama brayane amung lakar matatah dogen. Indik pawiwahan amung sameton dadiane dogen ane nawang," ibunne alon negesang.
135
