Sampune pada malipetan uli ngaba jauman lantas makejang nikaina teken Gusti Biang Ngurah apang pada madaar lan ngajengang.
"Nah, mangkin truna-trunine saha sameton tukang banten
makejang lautang malu ngajengang. Niki sampun wenten cawisan di
gunung rata duang sela, bale dangin duang sela," kenten Gusti Biang
Ngurah ngajakin. Truna-trunine apang pepek malu menek di bale dangin.
Mara sisanne bareng ajak tukang bantene menek di gunung rata.
"Beh, niki sucine kirangan malih sareng lima. Sira malih durung Tu Biang?"
"Nah apang gelisan mungpung beli Ngurah Gede rauh rarisang
munggah sareng Mbok Suci, Geg Sri, Geg Darsini, Ratna, lan cening Ngurah Darsana. Depang Ibu malu ane ngayahin,"Gusti Biang Ngurah
ngenterang ipah lan okanne apang bareng magibung. Mangkin lantas
mabriuk pada madaar lan ngajengang, pakremos namtamin lawar lan
sesatene mara lebeng. Ratna Dumilah kari milih-milih ngajeng lawar utawi timbungane.
"Ampurayang nggih Mbok, niki mantun tiange mara melajah magibungan."
"Mimiih, yadin tumben nanging sampun penter. Caranne matimpuh
pangus pisan, napi malih basa Balinne alus, ten wenten ngaden anak
len," pasaut tukang bantene aris sambilanga ngaud sesate ane mara
penekanga teken Gusti Ngurah Gede. Ratna Dumilah kari mitbit
timbungan saling betet ajak rabinne. Ibunne milihin sate ane empuk lan gebuh.
"Nah, ane ngelah gigi dadi suba makpak tulang nguda timbungane.
Sajaan Ibu masih demen nanging sing nyidaang baan ngutgut.
Kanggoang sesate lan nyuh-nyuh ajak jukut aresne dogen bagiane."
Ibunne nyiup kuah jukut arese mawadah jembung. Gusti Ngurah
134
