sereg kamare yen Blik lakar nyemak barange.” Ratna Dumilah mesuang kotak lan serege ane lakar serahanga teken beli lan ipahne.
“Beeh, kimud Mbok yen kene. Sujatinne mbok meriki gumanti apang maan tepuk teken Denda lan Dik Ngurah. Buka raos Mboke ane suba-suba, eda sanget sebetanga mara tonden baanga mulih. Manian yen mamiq suba nahnah sebet lan jengahne sinah baanga mulih. Lamun apa ja galak macane tusing lakar ngamah panakne padidi. Patuh cara Mbok ipidan mara icena mulih mapamit sasubane ada panake Agus,” raosne Gusti Ayu Sasih ngusuh-usuhin ipahne. Made Sinar lan Luh Purnama pesu uli paon ngaba kopi.
“Ngiring Kak Wira, Mbok Ayu cicipin sanganane. Nah Agus ajak denda enges, niki minum tehe ajak rotine. Kanggoang paman ten ngelah napi,” kenten Gusti Ngurah.
“Nggih dong ajeng wedange Nak Wira, Nak Ayu pada. Tiang matur suksma pang banget pelinggih kayun meriki nelokin adine.” Aji lan ibunne masih milu ngeturin. Kenten masih Pan Kobar lan kurenanne pada nyuksemayang rauhne Lalu Wiradana.
“Gusti Aji, Gusti Biang tiang wantah ajebos, apang uning dogen rencanane lunga. Mangkin tiang nunas mapamit.” kenten raosne sampune suud ngopi lantas masalaman.
“Beh, mangkin dumun Raden, niki sampun tengai. Ngiring ja deriki ngajengang,” kenten Wayan Rempuh lantas majalan ka paon lakar masoda, nanging andeganga.
“Sampunang ja Bibi, tiang sampun nyemeng ituni dugase lakar majalan meriki. Mangkin pang polih delodne ajebos.” Lalu Wiradana, Gusti Ayu Sasih lan panakne lantas nyalamin Pan Kobar, Wayan Rempuh muah aji lan ibunne Gusti Ngurah saha mapamit. Gusti Ngurah, Ratna Dumilah, Yan Galang, lan Luh Purnama milu nututin ka dunungane.
104
