Ratna Dumilah lan Gusti Ngurah morahan teken ibu ane ngelah
umahe yen alat-alatne lakar abana teken belinne mulih ka Sengkol,
sawireh uli buin mani raganne lakar mapamit nutug rabinne ka Bali
terus ka Atambua.
"Ibu, tiang sareng kurenan tiange benjang mapamit uli deriki.
Nunas sinampura yen pradene wenten kaiwangan utawi ten mantuk
ring kayun Ibu, sasue magenah deriki."
"Inggih, inggih Gusti Ngurah, tiang mula demen ngiring Lale
Dumilah, Gusti Ayu Sri, lan Luh Purnama deriki. Umah tiange wiakti
kapiara. Sulit ngrereh bajang-bajang sane rajin, polos, lan degeng sakadi
raganne. Yen mangkin sampun puput rarisang ambil sane mula kadue,"
Ibu kosne masaut aris. Ratna Dumilah mesuang barang-barangne lantas
penekanga teken Wayan Galang kamontor belinne. Pas pesan muat dadi
amontor. Alat-alat sekolahe baanga kaponakanne. Seprai lan sarung
galeng ane sampun manggon, kompor lan ember pangumbahan baanga
Luh Purnama. Sasampune pragat matetamped makejang sereg kamare
lantas serahanga teken Ibu kosne.
"Nah, dik Ngurah, Denda ajak Luh pada, mangkin tiang mapamit
malu. Dumadak buin mani nyidang ngatehang teked di Selaparang."
Lalu Wiradana ngusuh-usuhin adinne kang kinasih. Ratna Dumilah
ngeling sigsigan meluk belinne, ipahne, lan kaponakanne.
"Nggih kak Wira, mbok Ayu, ampurayang kaiwangan tiange sareng
Denda Milah. Rauhang teken mamiq lan inaq yen tiang mapamit.
Dumadak apang pada sehat walafiat." Gusti Ngurah nyalamin ipahne.
Ratna Dumilah tuara nyidang ngomong napi buin. Berat rasanne
ngelebin kaponakanne. Lalu Wiradana nyalanang montorne alon-alon.
Panakne negehang limanne ulap-ulap. Gusti Ngurah, Ratna Dumilah,
Luh Purnama minakadi Yan Galang milu ngulapin nganti ilid di marga
105
