"Mirib saja keto Luh. Dumadak patemun tiange si dori natakin tresnanne Tu Ngurah tusing maarti tiang nampedang sisan pilihan. Dumadak apang dadi panelah palabuhan tresnanne. Apa buin sasukat raganne maang bungkunge tenenan, satmaka cihnan kutaman tresnane putih bresih ane tampin tiang. Lakar tohin tiang mati Luh. Tiang lakar suud kuliah. Melahan suba tiang kursus kecantikan, masak, lan nyait. Utawi magae yen ada lowongan. Nyen nawang nadak-nadak Tu Ngurah pindah uli dini. Apang tusing repot lan rugi Inaq nyekolahang tiang," kenten Lale Dumilah nuturang unek-unekne, ane ngawe kenehne bingung.
"Ha ha ha ...., kaden ja Denda mula meled dadi Insinyur Pertanian, apang nyidayang madingang gumine tuh gaing di Lauq dadi gemah ripah loh jinawe, asing pula tumbuh lan mupu, apang tusing ada anak kuangan sandang lan pangan." Luh Purnama lantas ngelut timpalne ane makenyem nanging yeh paningalanne tetep mili.
"Saja ja keto. Nanging apa artinne i raga padidi lakar nangkepin pakewehe buka keto. Ulun yehe mula joh uli Jurang Sate ka Sengkol. Makudang kilo lakar lantang telabahe. Carike tuah mula ngandelang
tadah hujan, pamupune ngataun. Nanging yen pamerintahe nyak meanin dadi masih ngae sumur bor nganggon kincir angin. Yehne dadi anggon nyiram taneman gegadon misi palawija anggon panyelah taneman padine, luire kacang ijo, sela, bawang, kesuna, kedele, kacang tanah, lan ane lenlenan. Ento yen nuutang pituduh anak tua, ane ngaptiang apang panakne tetep jumah, nganten jumah, nganti mapanak macucu makilit ajak nyama braya lingsehane padidi.. Nyen nawang cara jani tiang matemu ajak Tu Ngurah, anak uli dija kapo. Apa ene ane madan jodoh?" Lale Dumilah bengong natakin jagut, inget teken mamiqne ane ngarepang pesan apang yen mani puan ia ngalih kurenan nyak
4
