bingung," kenten Lale Dumilah masawang sedih.
"Ah, nguda bingung. Ento artinne Inaq Dendane tusing kaberatan. Kewala jani sukserah Denda ajak Tu Ngurah. Apa nyidaang lakar ngantiang sawetara 4-5 tiban? Apa buin yen Tu Ngurah pindah uli dini ka kotane lenan. Yen maejohan dadi liu gagodane. Buktinne dini dogen Tu Ngurah liu ane nemenin. Denda, Made Sinar kayang tiang kaden mula demen lan tresna teken raganne. Jani dogen di Bali nyen nawang mirib suba jangkepanga teken Ibunne." Luh Purnama ngulgul timpalne. Lale Dumilah dadi masemu jengis masebeng ngeling, mawuwuh-wuwuh runtag kenehne.
"Beh, Luh malah dadi milu mapejejehin keto. Keneh tiange jani sedeng bingung. Sajan di Bali liunan anak jegeg, jemet magae, tur duweg-duweg. Masa saja nyak teken iraga. Miribang saja raganne suba ngelah gagelan ditu." Lale Dumilah sayan sangsaya.
"Saja denda. Tegarang pidenin. Amonto makelonne iraga gradaggrudug dini. Kaden Tu Ngurah sing taen culig macanda kaliwatan teken iraga. Apa buin ngalemesin. Enggalan iraga ane tusing tahan, bilang maekin raganne. Ento ngawe tiang lek sangkan kanggoang Yan Galang anggon gagelan," kenten Luh Purnama nyihnayang tresnanne.
"Ooh, saja Luh. Tiang masih merasa buka keto. Tambis-tambis tiang tusing tahan ngerasayang apang nyidang nuduk ulungan tresnanne Tu Ngurah. Sawireh caran raganne matimpal ngajak iraga makejang patuh. Yapin teken Gek Sri, Luh Ade, Luh Purnama. Nganti tiang nyerah kalah. Tiang sajan gemes garegetan. Syukur Gek Sri nyerah maluan sawireh raganne manyama, lan Luh suba ngenyakin Wayan Galang."
"Yen Dek Sinar sing dadi alangan, raganne enu cerik timpalang Tu Ngurah."
3
