81. Anak kene papadannya, yan andeyang kayu aking, di tengah alase reko, puwun tuara ada nulungin, ring paek pada mati, alase ngangsengin kebus, keto nyama braya, sai manyakitin ati, tuara nulung, apan ia kasakitan.
82. Kranane jani enggalang, ngawe darma uling cerik, kene papadannya reko, to ambengane iwasin, tajep nene nu cenik, ne tua tuara manusuk, yen benya suba tua, ngawe kadarmane cai, tuara mampuh, awak bongol buwin buta.
83. Twi tuara da mapala, sama jun misi tai, onyang tain nyane reko, lawut ingsahin pang pasti, pejangin miik-miik, bon nyane dadi maaduk, pengite tuara ilang, nyen seem mangadekin, dening letuh, adukin nene pawitra.
12a. 84. Letuhe masih kanggowan, melah nyane uling cenik, ngawe kadarmane reko, kayang tua eda ngengsapin, Pan Bungkling manyaurin, patut pisan jero Dukuh, mangawe legan manah, pituture sami becik, ngawe ayu, tan wenten ngiwangin sastra.
85. Yen nyandang tutugang, ajahin icang ne jani, dening icang jadma belog, arimbawane puniki, icang mabudi uning, bilih kangkat icang tuwut, malih takonang icang, tanah maka miwah langit, teja bayu, toya punapi wangsanya.
86. De dukuh kalintang lega, mangrasa suba ngulahin, pesu munyin nyane alon, sambilanga kenying-kenying, ento takonang cai, nah bapa ngorahang malu, ento pawakan dewa, tanah maka miwah langit, teja bayu, api madan panca buta.
87. Pada tong dadi belasang, tekaneng yehe cai, pan Ta Ala Talah reko, manyusupin sai-sai, anak mula abesik, buka tuturane bawu, tuara nyandang dawanang, ne arimbawane cai, anggon sikut, awake da ngelenang.
12b. 88. Tekening anake lenan, yan dadi ban ngentosin, anake tunden kaketo, yen tong dadi ban ngentosin, da maang sarwa prani, sikut jalemane itung, ento madan arimbawa, mamuput darmane cai, dadi kenyung, Pan Bungkling malih nakonang.
86
