73. Yen ne nawang sastra, kadarmane kapagonin, apan suba nawang abot, nawang ne nyandang pilihin, nawang masanin Aji, reswa peluta kahitung, karana dadi ngawakang, braala muah Ala Nabi apan puput, antuk dane mangitungang.
74. Laksanane nene darma, kene cacakane cai, eda mesuang munyi lempag, eda ngawe sakit ati, eda mamati mati, eda mangawe paibuk, eda mangrug sasana, eda teka iri ati, eda ajum, eda pisan mangawada.
75. Da jeneking para cacah, eda jeneking rasa becik, nging duluran nyane keto, arimbawa sai-sai, makelo ring panes tis, dening ia magawe ayu, ida ngilangang loba, teken kasukane dini, ne kapupu kasukane di suargan.
11a. 76. Wiakti nene ajanian, to madan panganti-anti, karana tuara pati lombos, manuwukin demen ati, yogane kauningin tuara ngitung-ngitung tuyuh, yan ada anak keto, ento madan bagia luwih, anden tebu, jalan nyane bawu siam.
77. Tuara ada i tebu dogan, nene mbahan etis, ajin paek manongos ditu, ia bareng pada etis, ada pengande buwin, buka kayu ne harum, nedeng mabunga kembang, sing paek ia pada miik, anak liyu, mabudi managih ngalap.
78. Buwin bapa tutuganga, uli bukannyane nguni, sarwa mauripe reko, jalemane paling luwih, apa karane luwih, keto to cai masawut, kene ucapan sastra, dening bisa ngawe tis, ngawe kebus, ngawe jele ngawe melah.
79. Bisa mangubadin awak, jalan nyane manggih sakit, nene lenan tuara keto, ento karana paling luwih, gawane nene jani, bin tembe bakal pupu, yan tuara ngawe melah, laksanane muat-mait, tuara ngitung, tekening atmane manian.
11b. 80. Nto madan kabancana, ngawe kasukane dini, yan kenehang tuara keto, ulih darma anggon ngalih, arta kama kapanggih, eda teka pati tuwuk, ngulahang legan awak, mangawe pangrara bacin, demen ajum, mangawenang kalinyokan.
85
