99
Rudita, tetap dane kahayahin, mirib ngayuh ban nyak ngayah, lega ngenot payu enyud, kakolongan babak, tan critanan ditu sai, gentosin jani carita, ring Purbawyanjana kawuwus.
V. PUH GINANTI
1. I Mladprana kawuwus, miragi orta sujati, dane Ni Jangga Ketakia, sampun reke kapakidih, maring dane I Rudita, saking bapannya ngardinin.
2. Osek dane maring kayun, pakayune nyadia manggih, apane anggon jalaran, ngrawos ring Jangga Ketaki, pisan surat jani baang, raris ia makarya tulis,
3. "Niki tulis mapitulus, nanginin sampun matangi, saksat nasikin segara, mitegehin gunung nginggil, ratu sampun lintang sueca, titiang malih jua makeling.
4. Antuk ubayane sampun, sampunang i ratu lali, sanggup i ratune suba, jele melah sareng kalih, mati matungalan bangbang, papa suarga titiang ngiring.
5. Ditu idupe mangda lulut, murup tresna makarasmin, tur masaksi pitra dewa, dulurin supata sai, nyen ja ngawit megat tresna, mangda kasisipang widi.
6. Yan ratu elong ring sanggup, mangda mangguy tan abecik, idupe nemu sengsara, yan mati nraka kapanggih, lebok ring kawah Gomuka, ring jambangan kapunpunin.
7. Yan titiang nitia ring atur, mangda dadi dasar gumi, mati dadi entip kawah, siu taun mangemasin, metis ring kayu curiga, katuwek ban lalang taji.
8. Krana titiang ratu agung, purun cepung mupasaksi, reh manahe culup terang, wantah sungleng ring i manik.
9. Nora lian ratu ayu, anggen titiang bungan ati, pinakayang pajimatan, pangilangan sakit hati, anggen titiang area mas, di pedeman sai lingling."
10. Kudiang lali dadi saru, ban ayune tan patanding, dewan pasihe i dewa, Sang Hyang Giri Putri nyiwi, Supraba lan Tilotama, kasor Ratih Saaswati.
11. Jegeg ing buana i ratu, bisa nglalunyuh ngaremih, muluk rempuh yan ngandika, kasor rebabe ban jangih, kemikan bibihe mlenyad, madu juruh kasor manis.
