nandang sakit, di tegale matambun, makejang nyilapin damuh, ne di muncuk ambengane, len atma rare katepuk, pangrenjeng pada manampa, kaubulu makejang.
91. Len atma ada buin katepuk, batan madurine, masesambatan mangeling, awake payah tuh, mata cekok batis abuh, munyine pati dulame, nguda kene dewa ratu, sue titiang kasakitan, manandang panca sangsara.
92. Inget titiang teken ne malu, duking mrecapada, ada ko ngelah akikit, santana ya manemu, buka tuara ya ibuk, gumerisin magewenang, mangenjuhin bubuh asidu, tungkul kalalen pangrasa, manuukin legan manah.
93. Ada atma ngenah bau rauh, saking mrecapada, marerod luh muani, bau suud kakubur, gagawene sarwa liu, jaja untek guling bebek, pesu munyinnyane alus, titiang manunas lungsuran, basang titiange bes layah.
94. Ne kaidihin tuara masaut, majalan ngenggalang, ne mangidih lintang brangti, mambegal lantas mangrebut, payu madukan amuug, manigtig baan timbungan, unteke anggon manimpug, nene kena mangurarap, mangeling nagih tulungan.
95. Mabiayuan ada seleng kepug, gegawene buyar, ne labuh ento prebutin, mangesop nyaup-nyaup, lenlenan celekat-celekut, dane I Bagus Diarsa, kangen mangatonang ditu, dadi inget teken awak, yeh matane patembuas.
96. Ada atma to ngenah magantung, di carang kepuhe, batannyane misi api, to atma janma dudu, misuna mangadu-adu, ada buin ngenah atma, kepung celeng muah asu, kagut-gut makuyayangan, matatu ngeling mangekak.
97. Ento atma tani nawang tutur, tingkah dadi janma, tan pangetang ling ning aji, satata mungpang laku, pada-pada teken pasu, ada malih katon atma, pinacoking paksi agung, muncar getihe sumirat,tatune dekdek nguranjang.
98. Ento atma manusane punggung, mangulahang awak, apang suka padidian, ada atma len rauh, pagrudug pada maawug,
56
