Nah tan kacrita reraosane totonanan, kacrita jani suba makatelun· ida di Singasari, lantas ida mantuk ka Koripan. Kacrita di subanne Gusti Made Subandar di puri Koripan, sai-sai kone ida ka jeroan I Patihe malelancaran. Dadi sabilang ida kema saling pandreng dogen ajaka Ni Wayan Sekar.
Nah sedek dina anu, polih kone nyingseang ngraos pakalihan ajaka Ni Wayan Sekar. Matakon kone Gusti Made Subandar,
"Embok Wayan, Embok Wayan." Tiang matakon, da Embok pedih, nah !"
"Inggih durusang Gusti Made."
"Nah da Embok mengkeban. Embok panaka sajaan teken Bapa Patih?" Masaur Ni Wayan Sekar,
"Inggih Gusti Made, nanging sampunang Gusti ngrewaang! Kawiaktianne tiang nenten pianaka ring Bapa Patih. Tiang okan Sang Prabu Daha. Kranan tiang dini, i maluan tiang palaibang pepeteng, ulung tiang di tengah alase, duduka lantas tiang teken Bapa Patih. Tiang ngelah adi muani abesik madan I Mantri Made. Dugas tiange nu jumah, adin tiange matuuh duang oton." Mara keto pangandikanne Raden Galuh Daha ngembeng kone toyan panyingakan Ida Raden Mantri Made, lantas matur,
"Embok, Embok, lamun Embok tera uning tiang suba adin Emboke, I Mantri Made." Mara keto saupa lantas Raden Mantri Made teken rakane, ditu lantas saling tangisin. Ajakina lantas Raden Mantri Made teken rakane mantuk ka Daha, nanging Raden Mantri tuara ngiring kene atur ida,
"Tiang nenten ngiring napi pakayunan Embok sane mangkin. Yan tonden tiang maan nadtad anak luh uli dini. Tiang nenten mamanah budal." Nah tusing kacrita buin bebaosan sang kalih.
Kacrita Gusti Made Subandar suba mantuk ka purian. Kacrita buin maninne, buin kone Gusti Made Subandar ka jeron I Patihe. Dening bes pepes Gusti Made Subandar tusing taen pati ngenah di puri, lantas intipa kone pamarginne teken Raden Mantri Koripan. Dadi uningina lantas pakaon Gusti Made Subandare kema ka jeron I Patihe. Ida Raden Mantri Koripan, lantas jag ngranjing kema,panggihin ida Gusti Made Subandar sedekan mabaosan ajaka Ni Wayan Sekar. Nanging dugas idane mara rauh ditu, jaga bah kone ida, ban ulangun idane nyingak kajegegan Ni
86
