2.5. I MADE SUBANDAR
2.5.1 Teks
I Made Subandar
Ada kone tutur-tuturan satua, Prabune di Daha madueputra dadua lanang istri, ane istri duuran, ane lanang alitan. Ane alitan mayusa mara duang oton, ane duuran suba truni. Prabune di Koripan madue masih oka dadua lanang istri, nanging duuran ane lanang.
Kacrita Ida Raden Galuh Daha, sedek ida malancaran di taman kairing ban I Nginte, Ngemban, lantas ida palaibang pepeteng. Di subanne ilang pepetenge, dening Ida Raden Galuh tusing ada, dadi makwewengan I Nginte Ngemban, lantas ngenggalang ka puri, ngaturang indik Ida Raden Galuh ilang, teken Ida Sang Prabu. Mawanan sungsut Ida Sang Prabu kalih Prameswari, tur lantas ida mencarang panjak ngruruh Ida Raden Galuh. Ada jenenga makatelun panjake mailehan ngalih Ida Raden Galuh masih tusing ada nepukin, mawanan malipetan kone lantas ajaka makejang, matur teken Ida Sang Prabu, nguningang buat pangruruhe tuara mapikolih.
Kacrita Ida Raden Galuh Daha, ulung kone ida di alas wewengkon Koripan. Kacrita jani I Gusti Patih di Koripan, sedek dane malon-alon kalase, kapanggihin lantas Raden Galuh sedek malinggih di batankayune. Ngon pesan kone Gusti Patih ban tumben dane manggihin anak luh bajang tur jegeg padidiana di alase. Lantas katakenin kone I Raden Galuh,
"Jero, Jero Anak Istri, sira Jerone dados deriki paragaan?" Masaur Raden Galuh,
"Inggih Jero anak lanang, tiang jelema lacur nenten uning ring adan muah meme bapa. Inget-inget jeg tiang deriki. Ne Jerone sira?"
"Nah lamun Jerone tusing nawang, bapa suba pepatih di Koripan. Beh padalem bapa ja Cening kene awak luh padidian di alase. Cening nyak duduk Bapa, bakal anggon Bapa pianak ! "
"Inggih, wenten ja olas Bapa nuduk tiang, tiang ngiring." Keto pangandikanidane, dadi ajaka lantas Raden Galuh ka Koripan, adanina kone Ni Wayan Sekar.
82
