keto, krana tusing pesan nganutin solah manusa. Ditu lantas Ida Sang Prabu ngandika teken I Patih, sing ja len pangraosidane buat matinangang okanidane dening buka keto. Atur I Patih, tuah nginutin dogen teken kayun Ida Sang Prabu. Sasubanne Ida Sang Prabu suud mabebaosan ajaka I Patih, ditu lantas Ida Sang Prabu ngaridikaang I Patih luas ka alase lakar ngaenang anake alit pondok, dening okane, pacang kagenahang ditu, krana Ida Sang Prabu suba meweh miara okane. I Patih tan tolak, teken pakayunan Ida Sang Prabu, lantas dane lunga kalase mairingan panjak adasa lakar ngaryanang Ida Raden Galuh Gede pondok cenik. Sasubanne pragat, kabakta lantas Ida Raden Galuh Gede kalase. Ditu kone Ida Raden Galuh Gede linggihanga di pondok pragana pesan. Bekelina ja masih ida sedengan tuah abulan.
Gelising satua di suban Ida Raden Galuh Gedene duur, karyan idane tuah ngalih saang lakar anggen ida ngrateng. Semengan suba kone ida makaon uli pondokidane luas ngrereh saang, sambilang ida ngrereh bakal jukut. Di subanne telah kone bekelidane kanggeang ida ngajengang woh-wohan muah jukut-jukutan dogenan. Yan buat ageng ragan Ida Raden Galuh Gedene, jani sing suba nyandang raosang. Yan sawataraang ada jenenga ambul kebone gedenne. Ento krananne sangkan ida maparab Galuh Gede.
Kacrita Ida Raden Mantri Koripan makayun ida nglanglang kalangun kalas Dahane. Mamargi lantas Ida Raden Mantri kairing ban l Patih, kalih panjakidane. Teked jene ida di alase, panggihina lantas pondok Ida Raden Galuh, lantas ida ngandika teken I Patih,
"Paman Patih, kema ja tegarang Paman nelokin pondoke ento, nyen ya ngelah lnto? Dadi teka tumben nira nepukin pondoke totonan. I pidan-pidanan ping kuda-kuda kaden nira mai, anak sing ja taen nepukin pondok dini!" Majalan lantas I Patih. Mara ia, neked ditu, sedekan kone Ida Raden Galuh 'ngrateng di puareganne. Tengkejut pesan I Patih, mara nyingakin Ida Raden Galuh, ban gedenne, kadena kone ida raksasa. Dening dane takut, ditu lantas dane nagih malaib. Enggalan kone cingakina teken Raden Galuh Saleh, tur ida ngandika,
"Ih Jero anak lanang, da Jerone takut teken tiang, da Jerone malaib apa, tiang sing ja ngudiang-ngudiang apa Jerone! Kakaden Jerone tiang raksasa keto, baan tiang gede buin tegeh. Sing tiang
68
