2.4 Raden Galuh Gede
2.4.1 Teks
Raden Galuh Gede
Kacrita Ida Sang Prabu Daha kanti suba atiban kone ida marabian masih tusing kone madrebe oka. Ento krananne sungsut pesan kayun Ida Sang Prabu kalih Ida Prameswari kakayunang dimani puane sing ada lakara ngentosin kagunganidane. Kanti suba telah baliane sawengkon Daha nambanin Ida Prameswari masih sing kone ida dadi mobot. Nuju purnama niaturan kone Ida Prameswari di pamrajanidana tur ditu ida masesangi, yening ida dados madrewe oka, pacang ngulurin sakita karep anake alit ngrayunang. Sesangin Ida Prameswari kapireng lantas antuk Ida Betara Guru, ditu lantas ida nyoba kayun Ida Prameswari kliwat sumbar ngamedalang raos.
Kacrita makelo-kelo ngrempini lantas Ida Prameswari. Beh apa kaden ledang kayun Ida Prameswari dening ida jani dadi.mobot. Apa buin Ida Sang Prabu tusing suba nyandang raosang buat ledang kayun idane, tur jani Ida Prameswari kasayangang pesan, saluiring ane tunas Ida Prameswari teken Ida Sang Prabu, tuara pesan taen kapucingin. Makayun ida teken ulam kidang, prajani Ida Sang Prabu ngandikaang parekan juru borose ngalih kidang ka alase. Yan tuara maan, tusing kaicen mulih. Aketo dogen jani indik Ida Prameswari tur lenlen awai ngangsan ngedenang bobotanidane. Suba jene tutug ulanan bobotanidane, lantas medal okanidane, lantas medal okanidane istri. Beh ledang pesan kayun Ida Prameswari kalih Ida Sang Prabu dening okane mokoh maplogpogan. Prajani kone ida ngadakang rame-rame. Dugase anake alit mara embas, icena kone biu abulih, telah kone baana ngajengang. Nyananne dadua icena teken Ida Prameswari, masih telah. Dugase ento arang pesan kone ada dagang biu, dadi kagohin kone katipat ajengan anake alit. Buin maninne icena kone katipat abungkul magoh biu tetelu, masih telah dogen baana ngajengang, tur anake alit len-len awai kone ngamokohang dogenan. Di subanne anake alit matuuh pitung dina, telah kone baana ngajengang katipat akelan, buka anake cerik ane suba telu bulan. Dening bas sai-sai keto, sabilang wai ngereng dogenan ngajengang tur suba ngagengang dogenan, dadi meweh Ida Sang Prabu makayunin indik okane buka
67
